ముఖ్య అంశాలు
- సింగిల్ స్క్రీన్ థియేటర్ల మనుగడ కోసం ‘రెంట్’ సిస్టమ్ బదులు ‘పర్సంటేజీ’ విధానాన్ని అమలు చేయాలని తెలంగాణ ఎగ్జిబిటర్ల అసోసియేషన్ డిమాండ్ చేసింది.
- మల్టీప్లెక్స్ల తరహాలోనే తమకు కూడా పర్సంటేజీ వాటా ఇవ్వాలని, పెద్ద సినిమాలకు సైతం ఈ విధానాన్నే వర్తింపజేయాలని కోరారు.
- ప్రస్తుతం సినిమాల రన్ టైమ్ తగ్గిపోయిన నేపథ్యంలో, రిస్క్ తగ్గించుకోవడానికి ఈ నిర్ణయం ఇటు నిర్మాతలు, అటు థియేటర్ యజమానులకు లాభదాయకమని స్పష్టం చేశారు.
టాలీవుడ్ ఇండస్ట్రీలో సింగిల్ స్క్రీన్ థియేటర్ల పరిస్థితి రోజురోజుకూ ఆందోళనకరంగా మారుతోంది. మల్టీప్లెక్స్ల రాక, ఓటీటీల హవా, సినిమాల రన్ టైమ్ తగ్గిపోవడం.. వీటన్నింటికీ తోడు అద్దెల భారం థియేటర్ల యజమానులను ఉక్కిరిబిక్కిరి చేస్తోంది. ఈ క్రమంలో తమను ఆదుకోవాలని, కనుమరుగవుతున్న సింగిల్ స్క్రీన్లను కాపాడాలని కోరుతూ తెలంగాణ ఎగ్జిబిటర్ల అసోసియేషన్ టాలీవుడ్ స్టార్ హీరోలకు, నిర్మాతలకు ఓ బహిరంగ లేఖ ద్వారా కీలక విజ్ఞప్తి చేసింది.
ప్రస్తుతం ఉన్న ‘రెంట్ లేదా పర్సంటేజీ’ విధానం వల్ల థియేటర్ల నిర్వాహకులకు తీవ్ర నష్టం వాటిల్లుతోందని ఎగ్జిబిటర్లు ఆవేదన వ్యక్తం చేస్తున్నారు. సింగిల్ స్క్రీన్లను బతికించుకోవాలంటే పాత పద్ధతిని పక్కనపెట్టి పూర్తిగా ‘పర్సంటేజీ షేరింగ్’ సిస్టమ్ను తీసుకురావాలని డిమాండ్ చేస్తున్నారు. ఏడాదిలో సుమారు 40 వారాల పాటు నిర్మాతలు ఈ పర్సంటేజీ విధానాన్నే ఫాలో అవుతున్నారని, పెద్ద సినిమాలకు కేటాయించే మిగిలిన 10 వారాలకు కూడా ఇదే రూల్ వర్తింపజేస్తే థియేటర్లు నిలదొక్కుకుంటాయని వారు సూచిస్తున్నారు.
ఒకప్పుడు సినిమాలు నెలల తరబడి ఆడేవి. ఉదాహరణకు ‘ఎఫ్ 2’ లాంటి సినిమా 8 వారాల పాటు థియేటర్లలో సందడి చేసింది. కానీ ఇప్పుడు పరిస్థితి పూర్తిగా మారింది. ఇటీవల వచ్చిన ‘ధురంధర్’ లాంటి సినిమాలు కేవలం రెండు మూడు వారాలకే పరిమితం అవుతున్నాయి. ప్రేక్షకులు ఒకేసారి ఎక్కువ థియేటర్లలో, అతి తక్కువ రోజుల్లో సినిమాను చూసేస్తున్నారు. ఇలాంటి పరిస్థితుల్లో మల్టీప్లెక్స్లకు పర్సంటేజీ విధానం అమలు చేస్తూ, మంచి కలెక్షన్లు రాబట్టే సింగిల్ స్క్రీన్లకు మాత్రం ఆ అవకాశం ఇవ్వకపోవడం వివక్షేనని ఎగ్జిబిటర్లు వాపోతున్నారు.
ముఖ్యంగా ‘పుష్ప’ లాంటి పాన్ ఇండియా హిట్ సినిమాలకు పక్క రాష్ట్రాల్లోని సింగిల్ స్క్రీన్లకు పర్సంటేజీ షేర్లు ఇచ్చారని, కానీ తెలుగు రాష్ట్రాల్లో మాత్రం ఆ అవకాశం ఇవ్వకపోవడం అన్యాయమని లేఖలో ప్రస్తావించారు. కోవిడ్ కంటే ముందు ఉన్న అద్దెల విధానాన్ని కొనసాగించడం ఇప్పుడు నిర్మాతలకు కూడా కష్టంగానే మారిందని, కాబట్టి పర్సంటేజీ మోడల్కు మారడం వల్లే ఇండస్ట్రీకి మేలు జరుగుతుందని వివరించారు. నష్టాలు, లాభాలను సమానంగా పంచుకునే ఈ విధానం టాలీవుడ్కు ఎంతో అవసరమని, సింగిల్ స్క్రీన్ల మ్యాజిక్ను బతికించుకునేందుకు అందరూ కలిసి రావాలని తెలంగాణ ఎగ్జిబిటర్ల అసోసియేషన్ కోరింది.
