విక్టరీ వెంకటేష్ ప్రస్తుతం త్రివిక్రమ్ శ్రీనివాస్ దర్శకత్వంలో ‘ఆదర్శ కుటుంబం’ సినిమా షూటింగ్లో బిజీగా ఉన్నాడు. ఈ చిత్రాన్ని మొదట వేసవి కానుకగా విడుదల చేయాలనుకున్నప్పటికీ, తాజా సమాచారం ప్రకారం దసరా బరిలో నిలపాలని మేకర్స్ భావిస్తున్నారు. అయితే, క్వాలిటీ విషయంలో ఎక్కడా రాజీపడని త్రివిక్రమ్, చివరి నిమిషం వరకు షూట్ చేస్తుంటారు. ఈ నేపథ్యంలో, తన పాత్రకు సంబంధించిన చిత్రీకరణను వీలైనంత త్వరగా పూర్తి చేయాలంటూ వెంకటేష్ ఇప్పుడు త్రివిక్రమ్పై ఒత్తిడి పెంచుతున్నాడట.
మరోవైపు, అనిల్ రావిపూడి దర్శకత్వంలో ఒక అవుట్ అండ్ అవుట్ ఎంటర్టైనర్ చేయడానికి వెంకటేష్ గ్రీన్ సిగ్నల్ ఇచ్చాడు. ఈ సినిమా షూటింగ్ కూడా ఇదే నెలలో ప్రారంభం కానుంది. ఈ చిత్రాన్ని సంక్రాంతి 2027 కానుకగా తీసుకురావాలని చిత్రబృందం టార్గెట్ పెట్టుకుంది. అనిల్ రావిపూడి ఇప్పటికే స్క్రిప్ట్ వర్క్ పూర్తి చేసి, షెడ్యూల్స్ కూడా ప్లాన్ చేసుకున్నాడు. అయితే వెంకటేష్ ‘ఆదర్శ కుటుంబం’ నుండి త్వరగా ఫ్రీ అయి, తన సినిమా సెట్స్లోకి ఎప్పుడు అడుగుపెడతాడా అని ఆయన ఎదురుచూస్తున్నాడు.
ప్రస్తుతం వెంకటేష్ రెండు ముఖ్యమైన సినిమాల మధ్య బ్యాలెన్స్ చేయాల్సిన కష్టమైన పరిస్థితిలో పడ్డాడు. దీనిపై ఆయన త్రివిక్రమ్తో మాట్లాడగా, జూలై నాటికి వెంకటేష్ పోర్షన్ పూర్తవుతుందని తెలుస్తోంది. ఒకవేళ ‘ఆదర్శ కుటుంబం’ షూటింగ్ ఇంకా ఆలస్యమైతే, అనిల్ రావిపూడి సినిమా కూడా లేట్ అవుతుంది. ఈ రెండు చిత్రాలను బ్యాలెన్స్ చేస్తూ, కేవలం నాలుగు నెలల వ్యవధిలోనే రెండు సినిమాలతో ప్రేక్షకుల ముందుకు రావడానికి వెంకటేష్ తీవ్రంగా కష్టపడుతున్నాడు.