దాదాపు వారం క్రితం రామానాయుడుగారిని కలిశాను. ఆయన ఆరోగ్య స్థితి చూసి, కలత చెందాను. రామానాయుడిగారితో నాది 35 ఏళ్ల అనుబంధం. రామనాయుడిగారి సంస్థలో నేను సుమారు పది చిత్రాల్లో నటించాను. వాటిలో ప్రజల గుండెల్లో చిరస్థాయిగా నిలిచిన చిత్రం ‘దేవత’. ఇంకా బ్రహ్మపుత్రుడు, కూలీ నం. 1.. ఇలా మంచి చిత్రాలు చేశాను. ఏ నటుడికైనా నిర్మాతే దేవుడు. ఒక నిర్మాత ఎలా ఉండాలి? అనేది ఆయన్ను చూసే తెలుసుకున్నాను. సెంటిమెంట్స్ కి ప్రాధాన్యం ఇచ్చే వ్యక్తి. నేను హైదరాబాద్ లో ఇల్లు కట్టుకున్నప్పుడు నాకెంతో ఆప్తులైన నా గురువు దాసరిగారు, అక్కినేని నాగేశ్వరరావుగారు, రామానాయుడుగార్లను సతీ సమేతంగా ఆహ్వానించాను. తెల్లవారు జాము ఐదు గంటలకు గుమ్మం పెట్టాం. అప్పుడు నిండు మనసుతో అందరూ మా కుటుంబాన్ని దీవించారు. వృత్తిపరంగానే కాదు వ్యక్తిగతంగా కూడా రామానాయుడుగారు నాకెంతో ఆప్తులు. మంచి స్నేహశీలిని పోగొట్టుకున్నాను. ఆయన మరణం తెలుగు సినిమా పరిశ్రమకే కాదు.. భారతీయ చలన చిత్రసీమకు తీరని లోటు.