విడుదల తేదీ : జనవరి 14, 2026
123తెలుగు.కామ్ రేటింగ్ : 3/5
నటీనటులు : నవీన్ పొలిశెట్టి, మీనాక్షి చౌదరి, రావు రమేశ్, తారక్ పొన్నప్ప, చమ్మక్ చంద్ర, అనంత్, రంగస్థలం మహేష్, భద్రం తదితరులు.
దర్శకుడు : మారి
నిర్మాణం : నాగవంశీ, సాయిసౌజన్య
సంగీతం : మిక్కీ జె. మేయర్
ఛాయాగ్రహణం : జె. యువరాజ్
కూర్పు : కళ్యాణ్ శంకర్
సంబంధిత లింక్స్ : ట్రైలర్
నవీన్ పోలిశెట్టి కథానాయకుడిగా నటించిన తాజా సినిమా ‘అనగనగా ఒక రాజు’ (Anaganaga Oka Raju). మారి దర్శకుడు. ఇందులో మీనాక్షి చౌదరి హీరోయిన్. ఈ రోజు థియేటర్లలో విడుదలైన ఈ సినిమా ఎలా ఉందో సమీక్ష చూద్దాం రండి.
(Anaganaga Oka Raju) కథ:
రాజు (నవీన్ పొలిశెట్టి) జమీందారీ కుటుంబంలో పుట్టినా.. బయటకు తెలియని పేదరికంలో బతుకుతూ ఉంటాడు. తన తాత చేసిన దుబారా ఖర్చులు కారణంగా రాజుకి ఆస్తులు ఏమి మిగలవు. ఇలాంటి రాజుకి అనుకోకుండా చారులత (మీనాక్షి చౌదరి) కనిపిస్తుంది. ఆమెను పెళ్లి చేసుకుంటే.. లైఫ్ సెట్ అవుతుందని.. ఆమెకు కోట్ల రూపాయల ఆస్తులు ఉన్నాయని.. చాలా ప్లాన్డ్ గా ఆమెను టార్గెట్ చేసి.. ప్రేమలో పడేసి పెళ్లి చేసుకుంటాడు రాజు. ఈ క్రమంలో జరిగిన కొన్ని నాటకీయ పరిణామాల నేపథ్యంలో చారులత గురించి, ఆమె తండ్రి పెట్టిన బాధ్యత గురించి రాజుకి అసలు నిజం తెలుస్తోంది. ఇంతకీ ఏమిటి ఆ నిజం?, అది తెలిశాక రాజు జీవితం తారుమారు అవుతుంది. మొత్తానికి తనకొచ్చిన ఆ సమస్యలు నుంచి రాజు ఎలా బయట పడ్డాడు ?, ఆ క్రమంలో రాజు ఏం సాధించాడు ?, చివరకు రాజు ఏం చేశాడు ? అనేది మిగిలిన కథ.
ప్లస్ పాయింట్స్ :
తన కామెడీ టైమింగ్ తో తెలుగు ప్రేక్షకులకు దగ్గర అయిన నవీన్ పొలిశెట్టి, ఈ సినిమాతో కూడా ఆకట్టుకున్నాడు. తన శైలి కామెడీ టైమింగ్ తో పాటు స్టైలిష్ ఎలిమెంట్స్ తో మరియు కొన్ని చోట్ల ఎమోషన్స్ తోనూ నవీన్ పొలిశెట్టి మెప్పించాడు. ముఖ్యంగా తన పాత్ర పరిస్థితులకు తగ్గట్టు వేరియేషన్స్ చూపిస్తూ.. నవీన్ పొలిశెట్టి నటించిన విధానం ఆకట్టుకుంది. హీరోయిన్ గా మీనాక్షి చౌదరి తన నటనతో అలరించింది. ముఖ్యంగా ఫస్ట్ హాఫ్ లో అలాగే సెకండ్ హాఫ్ లో మీనాక్షి చౌదరి తన నటనలో చూపించిన వేరియేషన్స్ బాగున్నాయి.
మరో ప్రధాన పాత్రలో నటించిన రావు రమేశ్ తన పాత్రలో ఒదిగిపోయారు. సిల్లీ సిచ్యుయేషన్స్ లో కూడా తన టైమింగ్ తో ఆయన తన పాత్రను చాలా బాగా పండించారు. మరో కీలక పాత్రలో కనిపించిన తారక్ పొన్నప్ప నటన కూడా బాగుంది. ఇతర కీలక పాత్రల్లో నటించిన చమ్మక్ చంద్ర, అనంత్, రంగస్థలం మహేష్ మరియు మిగిలిన నటీనటులు కూడా తమ పాత్రలకు న్యాయం చేశారు.
దర్శకుడు మారి తనకు మొదటి సినిమా అయినప్పటికీ, కామెడీని హ్యాండిల్ చేసిన విధానం బాగుంది. ముఖ్యంగా నవీన్ పొలిశెట్టి నటన, ఆ క్యారెక్టర్ను ఫన్నీగా తీర్చిదిద్దిన విధానం కూడా బాగుంది. మొత్తానికి సినిమాలో కొన్ని ఎమోషనల్ సీన్స్ తో పాటు కామెడీ సన్నివేశాలు బాగున్నాయి.
మైనస్ పాయింట్స్ :
నవీన్ పొలిశెట్టి పాత్రను, ఆ పాత్ర తాలూకు సీన్స్ ను బాగా డిజైన్ చేసుకున్నా, అంతే స్థాయిలో మిగిలిన పాత్రలను జనరంజకంగా క్రియేట్ చేయలేకపోయారు. అలాగే, సెకండ్ హాఫ్ లో కీలక సన్నివేశాల్లో ఆసక్తికరమైన కథనాన్ని రాసుకోవడంలో దర్శకరచయితలు కొన్ని చోట్ల విఫలం అయ్యారు. మొత్తానికి సెకండాఫ్ స్క్రీన్ ప్లేతో పాటు ప్రధాన పాత్రలను ఇంకా బలంగా రాసుకుని ఉండి ఉంటే సినిమాకి మేలు జరిగేది.
సాంకేతిక విభాగం :
దర్శకుడు మారి తన టేకింగ్ తో మెప్పించినా.. తీసుకున్న స్టోరీ లైన్ కి పూర్తి స్థాయిలో ఆకట్టుకునే విధంగా దర్శకరచయితలు స్క్రీన్ ప్లేను రాసుకోలేకపోయారు. సినిమాలో బ్యాక్ గ్రౌండ్ స్కోర్ బాగుంది. సంగీత దర్శకుడు మిక్కీ జె. మేయర్ అందించిన పాటలు పర్వాలేదు. సినిమాటోగ్రఫీ కూడా బాగుంది. సినిమాలోని చాలా సన్నివేశాలను చాలా బ్యూటిఫుల్ గా జె. యువరాజ్ చిత్రీకరించారు. ఇక ఎడిటింగ్ విషయానికి వస్తే.. అక్కడక్కడ ఉన్న కొన్ని సాగతీత సీన్స్ ను ఎడిటర్ తగ్గించాల్సింది. నిర్మాతలు నాగవంశీ, సాయిసౌజన్య ఎక్కడా కాంప్రమైజ్ కాకుండా ఈ చిత్రాన్ని నిర్మించారు. వారి నిర్మాణ విలువలు చాలా బాగున్నాయి.
తీర్పు :
‘’అనగనగా ఒక రాజు’’ (Anaganaga Oka Raju) అంటూ ఫుల్ ఫన్ ఎంటర్ టైనర్ గా వచ్చిన ఈ చిత్రంలో.. నవీన్ పోలిశెట్టి కామెడీ టైమింగ్, మెయిన్ థీమ్ మరియు కామెడీ సన్నివేశాలు అలాగే కొన్ని ఎమోషనల్ మూమెంట్స్ బాగున్నాయి. ఐతే, కొన్ని రెగ్యులర్ సీన్స్ వంటి అంశాలు సినిమాకి మైనస్ అయ్యాయి. ఓవరాల్ గా ఈ సినిమా యూత్ ఫుల్ కామెడీ ఎలిమెంట్స్ తో ఆకట్టుకుంది.
123telugu.com Rating: 3/5
Reviewed by 123telugu Team