టాలీవుడ్ మోస్ట్ క్యూట్ కపుల్ విజయ్ దేవరకొండ, రష్మిక మందన్న (విరోష్) వివాహ బంధంతో ఒకటైన సంగతి తెలిసిందే. రాజస్థాన్లోని ఉదయ్పూర్లో ఫిబ్రవరి 26న గ్రాండ్ గా పెళ్లి చేసుకున్న ఈ జంట, ఈరోజు (మార్చి 4న) హైదరాబాద్లోని తాజ్ కృష్ణా హోటల్లో తమ వెడ్డింగ్ రిసెప్షన్ను అంగరంగ వైభవంగా జరుపుకుంటోంది. టాలీవుడ్, బాలీవుడ్ సినీ ప్రముఖులతో పాటు పలువురు రాజకీయ నాయకులు సైతం ఈ ఈవెంట్ కు హాజరై కొత్త జంటను ఆశీర్వదిస్తున్నారు.
తాజాగా ఈ రిసెప్షన్ కు సంబంధించిన ఒక బ్యూటిఫుల్ ‘ఫోటో మూమెంట్’ సోషల్ మీడియాలో వైరల్ గా మారింది. ఈ ఫోటోలో విజయ్, రష్మిక తమ కుటుంబ సభ్యులతో కలిసి ఎంతో సంతోషంగా కెమెరాకు ఫోజులిచ్చారు. రష్మిక ఎరుపు రంగు పట్టు చీరలో, దానికి తగ్గ హెవీ గోల్డ్ జ్యువెలరీతో అచ్చమైన తెలుగింటి కోడలిలా మెరిసిపోతోంది. ఇక మన రౌడీ హీరో విజయ్ దేవరకొండ సంప్రదాయమైన వైట్ కలర్ వెస్టి (పంచెకట్టు) ధరించి చాలా సింపుల్ అండ్ రాయల్ లుక్ లో అదరగొట్టాడు.
ఈ బ్యూటిఫుల్ ఫ్యామిలీ పిక్చర్లో రష్మిక తల్లిదండ్రులు మదన్ మందన్న, సుమన్ మందన్న లతో పాటు విజయ్ పేరెంట్స్ గోవర్ధన్ రావు, మాధవి, అలాగే విజయ్ తమ్ముడు ఆనంద్ దేవరకొండ కూడా ఉన్నారు. అందరూ ఒకే ఫ్రేమ్లో నిలబడి పంచుకున్న ఈ మధుర క్షణాలు చూస్తుంటే రెండు కుటుంబాల మధ్య ఉన్న ఆనందం స్పష్టంగా కనిపిస్తోంది. ఫ్యాన్స్ ఈ ఫోటోను షేర్ చేస్తూ ‘పర్ఫెక్ట్ ఫ్యామిలీ‘ అంటూ సోషల్ మీడియాలో కామెంట్స్ చేస్తున్నారు.
అభిమానుల రద్దీ, సెక్యూరిటీ కారణాల దృష్ట్యా పోలీసుల సూచనల మేరకు ఈ రిసెప్షన్ను కేవలం ప్రత్యేక ఆహ్వానితులకు (invite-only) మాత్రమే పరిమితం చేశారు. ఎలాంటి ట్రాఫిక్ లేదా ఇతర ఇబ్బందులు రాకుండా ఈవెంట్ ను చాలా పకడ్బందీగా ప్లాన్ చేశారు. పెళ్లికి ముందు నుంచే తమ అభిమాన తారల జంటను ప్రేమగా ‘విరోష్’ (VIROSH) అని పిలుచుకుంటున్న ఫ్యాన్స్కు ఈ రిసెప్షన్ ఫోటోలు నిజంగా ఒక కన్నుల పండుగ అనే చెప్పాలి.