విడుదల తేదీ : సెప్టెంబర్ 03, 2026
123తెలుగు.కామ్ రేటింగ్ : 3/5
నటీనటులు : సుమంత్ ప్రభాస్, అనంతిక సనీల్కుమార్, వెంకటేష్ కాకుమాను, నరేంద్ర రవి, మణి ఏగుర్ల, సాయి సోహన్, ఉపేంద్ర లిమాయే తదితరులు
దర్శకత్వం : వేణుగోపాల్ రెడ్డి
సమర్పణ : సందీప్ రెడ్డి వంగా
సంగీతం : వాసుకి వైభవ్
ఛాయాగ్రహణం : పవన్ పప్పుల
కూర్పు : వేణుగోపాల్ రెడ్డి
సంబంధిత లింక్స్ : ట్రైలర్
‘మేమ్ ఫేమస్’ ఫేమ్ సుమంత్ ప్రభాస్ ప్రధాన పాత్రలో, ప్రముఖ దర్శకుడు సందీప్ రెడ్డి వంగా సమర్పణలో వచ్చిన యూత్ఫుల్ ఎంటర్టైనర్ ‘రోమాంచకం’. నేడు థియేటర్లలోకి వచ్చిన ఈ చిత్రం ప్రేక్షకులను ఏ మేరకు నవ్వించిందో సమీక్షలోకి వెళ్లి తెలుసుకుందాం.
కథ:
అన్వేష్ (సుమంత్ ప్రభాస్) ఒక స్టార్టప్ నడుపుతుంటాడు. అతడు చెన్నైకి చెందిన మైథిలి (అనంతిక సనీల్కుమార్)తో ప్రేమలో పడతాడు. అన్వేష్ను కలిసేందుకు మైథిలి హైదరాబాద్ వచ్చిన క్రమంలో అనూహ్య సమస్యలు మొదలవుతాయి. ఆమె రాకతో అన్వేష్, అతని స్నేహితుల బృందం ఎలాంటి చిక్కుల్లో పడ్డారు? అసలు మైథిలికి ఏమైంది? ఆ సమస్యల వలయం నుంచి అన్వేష్ అండ్ గ్యాంగ్ ఎలా బయటపడ్డారు? అన్నదే ఈ సినిమా కథ.
ప్లస్ పాయింట్స్:
‘రోమాంచకం’ సినిమా పెద్దగా కథాబలంపై కాకుండా, సిట్యువేషనల్, సిల్లీ కామెడీపైనే ఎక్కువగా ఆధారపడి సాగుతుంది. చాలావరకు ‘జాతిరత్నాలు’ జోన్ను తలపించేలా సాగే ఈ చిత్రంలో వినోదానికి లోటు లేకుండా చూసుకున్నారు. ముఖ్యంగా సెకండ్ హాఫ్లో వచ్చే ఫన్ ఎపిసోడ్స్ ఆడియన్స్ను బాగా నవ్విస్తాయి. క్లైమాక్స్ సీన్ను గందరగోళం (కన్ఫ్యూజన్) కామెడీతో డిజైన్ చేసిన విధానం సినిమాకు హైలైట్గా నిలిచింది.
సుమంత్ ప్రభాస్ తన కేర్ఫ్రీ యువకుడి పాత్రలో ఎంతో ఈజ్తో నటించి మెప్పించాడు. ఫన్ సీన్లలో చలాకీగా కనిపిస్తూనే, హీరోయిన్ అనంతికతో మంచి కెమిస్ట్రీ పండించాడు. అనంతిక కూడా తన పాత్ర పరిధి మేరకు చక్కటి స్క్రీన్ ప్రెజెన్స్తో ఆకట్టుకుంది.
ఇక హీరో ఫ్రెండ్స్ గ్యాంగ్గా కనిపించిన వెంకటేష్ కాకుమాను, నరేంద్ర రవి, మణి ఏగుర్ల, సాయి సోహన్ పాత్రలు సినిమాకు పెద్ద బలం. వీరిలో నరేంద్ర రవి తనదైన పంచ్ డైలాగులు, ఫ్రస్ట్రేషన్ ఎక్స్ప్రెషన్స్తో ప్రత్యేకంగా నిలిచాడు. ఉపేంద్ర లిమాయే పాత్ర కూడా నవ్వులు పూయిస్తుంది. ఫ్రెండ్స్ గ్యాంగ్ మధ్య వచ్చే సన్నివేశాలన్నీ తెరపై చాలా సరదాగా కుదిరాయి.
మైనస్ పాయింట్స్:
సినిమా మొదలైన తర్వాత ట్రాక్లోకి రావడానికి కాస్త ఎక్కువ సమయమే తీసుకుంటుంది. ఫస్ట్ హాఫ్ అక్కడక్కడా నెమ్మదిస్తూ ఎత్తుపల్లాలతో సాగుతుంది. ముఖ్యంగా స్నేహితుల మధ్య వచ్చే ఒక పాట కథా గమనానికి అడ్డంకిగా అనిపిస్తుంది, దాన్ని ఎడిట్ చేసి ఉంటే బాగుండేది.
పూర్తి స్థాయి వినోదంపై సాగే ఈ కథలో మధ్యలో తీసుకొచ్చిన సెల్ఫ్-రియలైజేషన్, ప్రేమకథలోని ఎమోషన్స్ అనుకున్న స్థాయిలో కనెక్ట్ కాలేదు.
సాంకేతిక వర్గం:
వాసుకి వైభవ్ అందించిన సంగీతం ఆహ్లాదకరంగా ఉంది. సినిమా గ్రాఫ్ పడిపోతున్న ప్రతిసారీ తన బ్యాక్గ్రౌండ్ స్కోర్తో ఆదుకున్నాడు. పవన్ పప్పుల సినిమాటోగ్రఫీ ఫ్రెష్ లుక్తో ఆకట్టుకుంది, పాటల చిత్రీకరణ బాగుంది. నిర్మాణ విలువలు సినిమాకు తగినట్లుగా ఉన్నాయి.
ఇక దర్శకుడు వేణుగోపాల్ రెడ్డి విషయానికి వస్తే, బడ్డీ కామెడీని హ్యాండిల్ చేయడంలో ఆయన చూపించిన ప్రతిభ మెప్పిస్తుంది. అయితే కొన్ని కీలక సన్నివేశాలపై మరింత శ్రద్ధ పెట్టాల్సింది. దర్శకుడే స్వయంగా చూసుకున్న ఎడిటింగ్ జస్ట్ ఓకే అనిపిస్తుంది.
తీర్పు:
మొత్తంగా చూస్తే, ‘రోమాంచకం’ వినోదమే ప్రధానంగా సాగే ఒక టైమ్పాస్ యూత్ఫుల్ ఎంటర్టైనర్. సుమంత్ ప్రభాస్ నటన, అతని స్నేహితుల గ్యాంగ్ మధ్య వచ్చే నవ్వుల సన్నివేశాలు సినిమాను ముందుకు నడిపించాయి. నెమ్మదిగా సాగే ఫస్ట్ హాఫ్, వర్కౌట్ కాని ఎమోషనల్ సీన్లు కాస్త నిరాశపరిచినా, ఎలాంటి అంచనాలు లేకుండా సరదాగా కాసేపు నవ్వుకోవాలనుకునే ప్రేక్షకులకు ఈ వారాంతంలో ఈ చిత్రం మంచి ఆప్షన్.
123telugu.com Rating: 3/5
Reviewed by 123telugu Team