సినిమా రిలీజ్ డేట్ దగ్గరపడుతుందంటే చాలు.. డైరెక్టర్లు నిద్ర లేకుండా పనిచేస్తున్నారని, రోజుల తరబడి ఇంటి మొహం కూడా చూడటం లేదంటూ వచ్చే పోస్టులు ఈ మధ్య సోషల్ మీడియాలో బాగా పెరిగిపోయాయి. గతంలో ఇలాంటి విషయాలు విన్నప్పుడు ప్రేక్షకుల్లో కాస్త సానుభూతి కనిపించేదేమో కానీ, ఇప్పుడు మాత్రం నెటిజన్ల నుంచి పూర్తి భిన్నమైన రియాక్షన్లు వస్తున్నాయి. డెడికేషన్ పేరుతో చివరి నిమిషంలో పడే ఈ హడావుడిని గొప్పగా చెప్పుకోవడంపై ఆడియన్స్ సూటిగానే పెదవి విరుస్తున్నారు.
అంకితభావమా.. ప్లానింగ్ లోపమా?
సినిమా కోసం దర్శకుడు కష్టపడటాన్ని ఎవరూ కాదనరు. కానీ చేతిలో కావాల్సినంత సమయం, వందల కోట్ల బడ్జెట్ ఉన్నప్పుడు సరైన ప్లానింగ్తో పనులు పూర్తి చేసుకోవచ్చు కదా అనేది సినీ ప్రియుల ప్రశ్న. చివరి 40 రోజులు నిద్రపోకుండా పోస్ట్ ప్రొడక్షన్ చేస్తున్నామని చెప్పుకోవడం వర్క్ డెడికేషన్ కాదని, అది ముమ్మాటికీ ప్రణాళికా లోపమేనని నెటిజన్లు కుండబద్దలు కొడుతున్నారు.
కంటెంటే అసలైన ప్రచారం
ఇలాంటి ‘లాస్ట్ మినిట్ స్టంట్స్’ వల్ల సినిమాపై కొత్తగా హైప్ పెరగకపోగా, లేనిపోని అనుమానాలు తలెత్తుతున్నాయని సినీ ప్రియులు పెదవి విరుస్తున్నారు. తెరపై కంటెంట్ బలంగా ఉండి ప్రేక్షకుడికి నచ్చితే సినిమా దానంతట అదే ఆడుతుంది. అంతేకానీ, దర్శకుల వ్యక్తిగత శ్రమను సింపతీ కార్డులా ప్రచారానికి వాడటం వల్ల థియేటర్లకు జనం రారనే విషయాన్ని ఇప్పటికైనా గ్రహించాలని నెటిజన్లు స్పష్టం చేస్తున్నారు.