ముఖ్య అంశాలు
- టాలీవుడ్ క్లాసిక్ ‘నువ్వే కావాలి’ చిత్రంలో నటించే అవకాశాన్ని నటుడు సుమంత్ మిస్ చేసుకున్నారు.
- ఆ సమయంలో ‘యువకుడు’, ‘పెళ్లి సంబంధం’ సినిమాల షూటింగ్స్ వల్ల డేట్స్ కుదరక ఈ ఆఫర్ను వదులుకోవాల్సి వచ్చిందని చెప్పారు.
- నిర్మాత స్రవంతి రవికిషోర్ తనకు మలయాళ ఒరిజినల్ ‘నిరమ్’ చూపించారని, ఆ ఇండస్ట్రీ హిట్ సినిమా చేయలేకపోయాననే బాధ ఇప్పటికీ ఉందని తెలిపారు.
తెలుగు చిత్రసీమలో సరికొత్త చరిత్ర సృష్టించిన యూత్ఫుల్ ఎంటర్టైనర్ ‘నువ్వే కావాలి’. తరుణ్, రిచా జంటగా నటించిన ఈ చిత్రం అప్పట్లో బాక్సాఫీస్ వద్ద ఇండస్ట్రీ హిట్ కొట్టిన సంగతి తెలిసిందే. అయితే, ఈ ఆల్ టైమ్ హిట్ మూవీ ఆఫర్ ముందుగా అక్కినేని హీరో సుమంత్ వద్దకే వచ్చింది. ఇటీవల ఇచ్చిన ఒక ఇంటర్వ్యూలో ఆయన ఈ విషయాన్ని స్వయంగా వెల్లడించారు.
‘నువ్వే కావాలి’ కథను తాను వదులుకోవాల్సి రావడంపై సుమంత్ స్పందిస్తూ.. “ప్రతి నటుడి కెరీర్లోనూ కొన్ని మంచి సినిమాలను మిస్ చేసుకునే పరిస్థితులు వస్తుంటాయి. నా విషయంలో ‘నువ్వే కావాలి’ చిత్రానికి అలాగే జరిగింది. ఆ సమయంలో నేను ‘యువకుడు’, ‘పెళ్లి సంబంధం’ సినిమాల షూటింగ్స్తో బిజీగా ఉన్నాను. దీనివల్ల ఈ ప్రాజెక్ట్కి కాల్ షీట్స్ కేటాయించడం సాధ్యపడలేదు” అని చెప్పారు.
మలయాళంలో సూపర్ హిట్ అయిన ‘నిరమ్’ సినిమాకి ఇది రీమేక్ అని పేర్కొన్న సుమంత్.. నిర్మాత స్రవంతి రవికిషోర్ తనకు ఆ ఒరిజినల్ సినిమాను చూపించారని గుర్తుచేసుకున్నారు. కథ ఎంతగానో నచ్చినప్పటికీ డేట్స్ సెట్ కాకపోవడంతో వదులుకోవాల్సి వచ్చిందని, అంతటి సంచలన విజయం సాధించిన ఇండస్ట్రీ హిట్ సినిమాను చేయలేకపోయాననే బాధ ఇప్పటికీ తనలో ఉండిపోయిందని ఆయన తెలిపారు.
