ప్రపంచవ్యాప్తంగా సంచలనం సృష్టించిన ‘కల్కి 2898 AD’ (Kalki 2898 AD) చిత్రానికి సీక్వెల్ పనులు ఎట్టకేలకు పట్టాలెక్కుతున్నాయి. దర్శకుడు నాగ్ అశ్విన్ స్క్రిప్ట్ను పక్కాగా సిద్ధం చేయడంతో, నేటి నుండి ఈ భారీ ప్రాజెక్ట్ షూటింగ్ ప్రారంభం కానుంది. ఇందుకోసం హైదరాబాద్ శివార్లలోని శంకర్ పల్లిలో ఉన్న ఒక భారీ స్టూడియోలో, దేశంలోనే అతిపెద్ద సెట్స్లో ఒకదానిని చిత్ర బృందం సిద్ధం చేసింది.
బాలీవుడ్ దిగ్గజం అమితాబ్ బచ్చన్ ఇప్పటికే హైదరాబాద్ చేరుకున్నారు. ఈ షెడ్యూల్లో ప్రభాస్ మరియు అమితాబ్ మధ్య వచ్చే అత్యంత కీలకమైన సన్నివేశాలను చిత్రీకరించనున్నారు. ఈ షెడ్యూల్ కోసం ప్రభాస్ పది రోజుల సమయాన్ని కేటాయించారు. అలాగే, ఈ సీక్వెల్లో ఒక ముఖ్యమైన పాత్ర కోసం నేచురల్ యాక్ట్రెస్ సాయి పల్లవిని ఎంపిక చేసినట్లు తెలుస్తోంది. ఇటీవల ఆమెపై లుక్ టెస్ట్ కూడా నిర్వహించారని, త్వరలోనే ఆమె రాకపై అధికారిక ప్రకటన వెలువడనుందని సమాచారం.
వైజయంతీ మూవీస్ బ్యానర్పై భారీ నిర్మాణ విలువలలో రూపొందుతున్న ఈ చిత్రంలో లోకనాయకుడు కమల్ హాసన్ ప్రధాన ప్రతినాయకుడిగా కనిపించనున్నారు. ప్రభాస్ ఒకవైపు ‘ఫౌజీ’, ‘స్పిరిట్’ చిత్రాలతో బిజీగా ఉన్నప్పటికీ, తన గ్లోబల్ ప్రాజెక్ట్ అయిన ‘కల్కి’ (Kalki) సీక్వెల్కు ప్రాధాన్యత ఇస్తూ షూటింగ్లో పాల్గొంటున్నారు. ఈ అప్డేట్తో ప్రభాస్ అభిమానుల్లో ఒక్కసారిగా జోష్ పెరిగింది.