దళపతి విజయ్ నటిస్తున్న ప్రతిష్టాత్మక చిత్రం ‘జన నాయగన్’ విడుదల తేదీపై గత కొన్ని రోజులుగా సోషల్ మీడియాలో రకరకాల ఊహాగానాలు వినిపిస్తున్నాయి. తాజా సమాచారం ప్రకారం, ఈ చిత్రానికి సంబంధించి సెన్సార్ పనులు ఈ వారంలోనే పూర్తి కానున్నాయి. ఎన్నికల పోలింగ్ ముగిసిన వెంటనే, ఏప్రిల్ 24, 2026న సినిమాను విడుదల చేయాలని చిత్ర బృందం యోచిస్తున్నట్లు తెలుస్తోంది. రాజకీయ ఫలితాల ప్రభావం సినిమాపై పడకుండా ఉండాలనే ఉద్దేశంతో ఈ వ్యూహాత్మక నిర్ణయం తీసుకుంటున్నట్లు సమాచారం.

​ముఖ్యంగా ఏప్రిల్ 24వ తేదీ విడుదల అయితే బాక్సాఫీస్ వద్ద ఈ చిత్రానికి భారీ కలిసొచ్చే అవకాశం ఉంది. ఆ సమయంలో ఇతర పెద్ద సినిమాలు ఏవీ పోటీలో లేకపోవడం, పైగా మే డే సెలవులు దగ్గరగా ఉండటం సినిమా వసూళ్లకు ప్లస్ పాయింట్ కానుంది. ఒకవేళ ఏప్రిల్ 30న విడుదల చేయాలనుకుంటే, అప్పటికే ‘కరా’, ‘పెద్ది’ వంటి భారీ చిత్రాలు బరిలో ఉన్నందున గట్టి పోటీ ఎదురయ్యే అవకాశం ఉంది. అందుకే క్లాష్‌ను నివారించేందుకు ఏప్రిల్ 24కే మేకర్స్ మొగ్గు చూపుతున్నట్లు ఇండస్ట్రీ వర్గాల్లో చర్చ నడుస్తోంది.

​నిజానికి ‘జన నాయగన్’ ఈ ఏడాది సంక్రాంతి కానుకగా జనవరి 9నే విడుదల కావాల్సి ఉంది, కానీ సెన్సార్ ఇబ్బందుల వల్ల వాయిదా పడింది. విజయ్ తన రాజకీయ జీవితంలో తొలిసారిగా ఎన్నికల్లో పోటీ చేస్తున్న తరుణంలో, ఈ సినిమా ఆయన కెరీర్‌లోనే అత్యంత కీలకమైందిగా మారింది. ప్రస్తుతం రివైజింగ్ కమిటీ నుండి క్లియరెన్స్ కోసం కె.వి.ఎన్ ప్రొడక్షన్స్ వేచి చూస్తోంది. ఈ వారంలో సర్టిఫికేషన్ ప్రక్రియ పూర్తయిన వెంటనే విడుదల తేదీపై అధికారిక ప్రకటన వచ్చే అవకాశం ఉంది.