టాలీవుడ్ బాక్సాఫీస్ దగ్గర ఇద్దరు పెద్ద డిస్ట్రిబ్యూటర్లు తలపడుతున్నారంటే చాలు.. థియేటర్ల కోసం పెద్ద యుద్ధమే జరుగుతుందనే చర్చ మొదలవుతుంది. ఇప్పుడు సరిగ్గా ఇలాంటి ఆసక్తికరమైన పోటీనే నైజాం ఏరియాలో కనిపిస్తోంది. కోలీవుడ్ స్టార్ హీరో దళపతి విజయ్ నటించిన ‘జన నాయగన్’ (తెలుగు డబ్) సినిమా జూలై 23న రిలీజ్ అవుతోంది. ఈ క్రేజీ ప్రాజెక్ట్ నైజాం హక్కులను దిల్ రాజు దక్కించుకున్నారు. దీనికి సరిగ్గా ఒక్క రోజు వ్యవధిలోనే, అంటే జూలై 24న కిరణ్ అబ్బవరం హీరోగా వస్తున్న ‘చెన్నై లవ్ స్టోరీ’ సినిమా థియేటర్లలోకి రానుంది. ఈ చిత్రాన్ని మైత్రి మూవీ మేకర్స్ ప్రతిష్టాత్మకంగా రిలీజ్ చేస్తుండటంతో ఇండస్ట్రీలో హీట్ పెరిగింది.
బ్యాక్ టు బ్యాక్ డేట్స్ లో ఈ సినిమాలు వస్తుండటంతో థియేటర్ల సర్దుబాటు ఎలా ఉండబోతోంది? మైత్రి డిస్ట్రిబ్యూషన్ లో వస్తున్న సినిమాకు ఏమైనా ఇబ్బందులు వస్తాయా? అనే సందేహాలు సినీ వర్గాల్లో రేకెత్తాయి. ఈ క్రేజీ బాక్సాఫీస్ ఫైట్ మరియు థియేటర్ల లభ్యతపై ‘చెన్నై లవ్ స్టోరీ’ నిర్మాత ఎస్కేఎన్ తాజాగా క్లారిటీ ఇచ్చారు. సినిమా ప్రమోషన్స్ లో భాగంగా ఎదురైన ఈ సూటి ప్రశ్నకు ఆయన చాలా హుందాగా, ప్రాక్టికల్ గా సమాధానం ఇచ్చి అందరినీ ఆకట్టుకున్నారు.
పాత బంధాలు.. సరికొత్త సమీకరణాలు
దిల్ రాజుతో పోటీ గురించి ఎస్కేఎన్ మాట్లాడుతూ.. తన గతాన్ని ఒకసారి గుర్తు చేసుకున్నారు. తాను పిఆర్ఓగా కెరీర్ బిల్డ్ చేసుకుంటున్న రోజుల్లో దిల్ రాజు బ్యానర్ లో వచ్చిన ఎన్నో సినిమాలకు పని చేశానని చెప్పారు. అలాగే ఈ ప్రాజెక్ట్ తో ముడిపడి ఉన్న రాజేష్ కూడా దిల్ రాజుకు అత్యంత ఆప్తుడని పేర్కొన్నారు. ఇండస్ట్రీలో ఒకరితో ఒకరికి పర్సనల్ గా ‘వర్సెస్’ (పోటీ) అనే వాతావరణం ఎప్పుడూ ఉండదని, అందరం కలిసికట్టుగానే ఉంటామని ఈ సందర్భంగా ఆయన స్పష్టం చేశారు.
పెద్ద సినిమాలు ఒకేసారి వచ్చినప్పుడు థియేటర్ల సర్దుబాటు విషయంలో ఎలాంటి గొడవలు ఉండవని ఎస్కేఎన్ ఆశాభావం వ్యక్తం చేశారు. దిల్ రాజు గారు ఖచ్చితంగా పెద్ద మనసుతో తమ ‘చెన్నై లవ్ స్టోరీ’ చిత్రానికి కూడా మంచి థియేటర్లనే కేటాయిస్తారనే గట్టి నమ్మకం తనకు ఉందని వినమ్రంగా చెప్పారు. మొత్తానికి బాక్సాఫీస్ వద్ద జూలై 23, 24 తేదీల్లో గట్టి పోటీ ఉన్నా.. ట్రేడ్ వర్గాల్లో మాత్రం హెల్తీ అట్మాస్ఫియర్ ఉందనే విషయాన్ని ఎస్కేఎన్ తన మాటలతో మరోసారి ప్రూవ్ చేశారు.