ప్రభాస్, సందీప్ రెడ్డి వంగా కాంబినేషన్లో వస్తున్న ‘స్పిరిట్’ సినిమా టాలీవుడ్ పరిధిని దాటి ‘పాన్ వరల్డ్’ స్కేల్లో ప్లాన్ అవుతోంది. ఈ చిత్రాన్ని భారతీయ భాషలతో పాటు మాండరిన్, జపనీస్, కొరియన్ వంటి మొత్తం ఎనిమిది భాషల్లో ఒకేసారి ప్రపంచవ్యాప్తంగా విడుదల చేయడానికి మేకర్స్ సిద్ధమవుతున్నారు. మన సినిమాలు ఇక్కడ హిట్ అయ్యాక విదేశాల్లో డబ్ చేయడం కాకుండా, ముందే గ్లోబల్ రిలీజ్ టార్గెట్ పెట్టుకోవడం ఒక డేరింగ్ స్టెప్.
కొరియా, జపాన్ ప్రేక్షకులకు డార్క్ కంటెంట్, రా యాక్షన్ సినిమాలు అంటే చాలా ఇష్టం. సందీప్ వంగా అగ్రెసివ్ టేకింగ్ కూడా అదే స్టైల్లో ఉంటుంది. ఇందులో ప్రభాస్ సస్పెండ్ అయిన పవర్ఫుల్ పోలీస్ ఆఫీసర్గా, ఇంటర్నేషనల్ క్రైమ్ సిండికేట్ను ఒంటరిగా ఎదుర్కొనే పాత్రలో కనిపిస్తున్నారు. కొరియన్ మూవీ లవర్స్ ఆశించే ఎమోషన్, బ్లడ్ షెడ్ ఈ డార్క్ యాక్షన్ థ్రిల్లర్లో పుష్కలంగా ఉండటంతో ఈ కాన్సెప్ట్ అక్కడ బాగా కనెక్ట్ అవుతుందని మేకర్స్ నమ్ముతున్నారు.
టీ సిరీస్, భద్రకాళి పిక్చర్స్ భారీ బడ్జెట్తో నిర్మిస్తున్న ఈ సినిమాలో త్రిప్తి దిమ్రి హీరోయిన్గా, వివేక్ ఒబెరాయ్ పవర్ఫుల్ విలన్గా నటిస్తున్నారు. ఈ అంతర్జాతీయ ప్రయోగం గనక పర్ఫెక్ట్గా క్లిక్ అయితే, ఈస్ట్ ఏషియన్ దేశాల నుండి వచ్చే కలెక్షన్లతో టాలీవుడ్ బాక్సాఫీస్ లెక్కలు, బిజినెస్ రేంజ్ పూర్తిగా మారిపోవడం ఖాయం.