టాలీవుడ్లో వరుస హిట్ చిత్రాలతో తనకంటూ మంచి గుర్తింపు తెచ్చుకున్న శ్రీలీల ఇటీవల కష్టకాలంలో పడింది. ఆమెకు విజయాల కంటే పరాజయాలే ఎక్కువగా ఎదురవుతున్నాయి. వరుసగా సినిమాలు చేస్తూ అభిమానులను ఎంటర్టైన్ చేయాలని ఈ బ్యూటీ భావిస్తోంది. కానీ, ఈ క్రమంలో ఆమె తీసుకుంటున్న తొందరపాటు నిర్ణయాలపై విమర్శలు ఎదురవుతున్నాయి. అదే సమయంలో ఖాళీ దొరికినప్పుడల్లా హిందీ, తమిళ చిత్రాలపై కూడా దృష్టి పెట్టింది. ఈ క్రమంలో శివకార్తికేయన్ నటించిన ‘పరాశక్తి’(Parasakthi) లో ఆమె నటించగా, ఈ సినిమా తమిళంలో రిలీజ్ అయింది.
కానీ, ‘పరాశక్తి’ చిత్రం అక్కడి ప్రేక్షకులను ఆకట్టుకోలేకపోయింది. ఈ మూవీకి అక్కడ చాలా నిరాశాజనకమైన రెస్పాన్స్ దక్కింది. దీంతో ఈ చిత్రం భారీ డిజాస్టర్ దిశగా సాగుతోంది. గత కొన్ని సంవత్సరాలుగా శివకార్తికేయన్ మంచి చిత్రాలు చేసినప్పటికీ, ‘పరాశక్తి’ ఆయన కెరీర్లో ఇటీవలి కాలంలోనే అతిపెద్ద ఫ్లాప్గా నిలుస్తోంది. ఈ సినిమాతో శ్రీలీలకు తమిళంలో కూడా చేదు అనుభవం ఎదురైంది.
ప్రస్తుతం ఆమె పవన్ కల్యాణ్ సరసన ‘ఉస్తాద్ భగత్ సింగ్’ షూటింగ్ను పూర్తి చేసింది. అలాగే కార్తిక్ ఆర్యన్ హీరోగా అనురాగ్ బసు దర్శకత్వంలో తెరకెక్కిన ఆమె తొలి హిందీ చిత్రాన్ని కూడా ముగించింది. అయితే ఇప్పటివరకు కొత్త తెలుగు సినిమాను ప్రకటించలేదు. రాబోయే రోజుల్లో కొత్త ప్రాజెక్టులకు సంతకం చేసే ముందు శ్రీలీల మరింత జాగ్రత్తగా ఆలోచించాల్సిన అవసరం ఉందనే అభిప్రాయం వ్యక్తమవుతోంది.