పండుగ‌ల‌కు సినిమాల‌ను ఓటీటీల్లో విడుద‌ల చేయ‌కండి – సునీల్ నారంగ్

Published on Aug 20, 2021 8:10 pm IST

కరోనా కారణంగా మూతపడిన థియేటర్స్ ఈ మధ్యే తెరుచుకున్నాయి. దీంతో చాలా సినిమాలు థియేటర్లలో రిలీజ్ అవుతుండగా, మరికొన్ని సినిమాలు రిలీజ్ డేట్లను ప్రకటిస్తున్నాయి. మొన్నటివరకు థియేటర్స్ మూసి ఉండడంతో చాలా సినిమాలు ఓటీటీలను ఆశ్రయించాయి. ఇక ఇప్పుడు థియేటర్స్ తెరుచుకున్నా కూడా కొన్ని సినిమాలు ఓటీటీ రిలీజ్‌కే సిద్ధమవుతున్నాయి. దీనిపై తెలంగాణ థియేటర్ల ఓనర్స్ నిర్మాతలపై అసంతృప్తిని వ్యక్తం చేస్తున్నారు. ఈ నేపధ్యంలో నేడు తెలుగు ఫిలించాంబ‌ర్‌లో తెలంగాణ థియేటర్స్ ఓనర్స్ అసోసియేషన్ ప్రెస్ మీట్ నిర్వహించారు. ఈ స‌మావేశంలో తెలంగాణా ఫిలిం ఛాంబర్ ఆఫ్ కామర్స్ వైస్ ప్రెసిడెంట్ శ్రీధర్, సెక్రెటరీ సునిల్ నారంగ్, జాయింట్ సెక్రటరీ బాల గోవింద్ రాజ్, టిఎఫ్‌సీసీ మెంబర్ అనుపమ్ రెడ్డి, థియేటర్ ఓనర్స్ అసోసియేషన్ సెక్రెటరీ విజయేందర్ రెడ్డి, నిర్మాత చదలవాడ శ్రీనివాసరావు, జెమిని కిరణ్ తదితరులు పాల్గొన్నారు.

ఈ సందర్భంగా సునీల్ నారంగ్ మాట్లాడుతూ “గ‌త నెల‌లో డిస్ట్రిబ్యూట‌ర్స్‌, ఎగ్జిబిట‌ర్స్‌ ప్రెస్‌మీట్ పెట్టిన‌ప్పుడు సినిమాల‌ను ఓటీటీలో విడుద‌ల చేయ‌వ‌ద్దంటూ రిక్వెస్ట్ చేశాం. అయితే ట‌క్ జ‌గ‌దీష్‌ సినిమాను నిర్మాత‌లు ఓటీటీలో విడుద‌ల చేయ‌డానికి సిద్ధ‌మ‌య్యారని, స‌ద‌రు నిర్మాత‌ల‌కు మేం ఫోన్ చేస్తే వారి ఆర్థిక ఇబ్బందులు గురించి చెప్పారని, దీని గురించి ఓ క‌మిటీ వేసి మాట్లాడుతామ‌ని అనుకున్నాం. అయితే మేం ల‌వ్‌స్టోరి సినిమాను సెప్టెంబ‌ర్ 10న విడుద‌ల చేయ‌బోతున్న‌ట్లు అనౌన్స్ చేశాం. కానీ అదే రోజున వాళ్లు ట‌క్‌ జ‌గ‌దీష్ సినిమాను అమెజాన్‌లో విడుద‌ల చేయ‌బోతున్న‌ట్లు తెలిసింది. నేను సినిమా రిలీజ్ చేసుకుంటాను. నాకు ఎలాంటి స‌మ‌స్య లేదు. అయితే భ‌విష్య‌త్తులో ఇలాగే కొన‌సాగ‌లేం. ఎగ్జిబిట‌ర్ అనేవాడు డిస్ట్రిబ్యూట‌ర్‌కు డ‌బ్బులు క‌ట్ట‌లేడు. అలాగే డిస్ట్రిబ్యూట‌ర్ అనేవాడు ప్రొడ్యూస‌ర్‌కు డ‌బ్బులు క‌ట్ట‌లేడు. చివ‌ర‌కు నిర్మాత‌ల‌కే డ‌బ్బులు రావు. నిర్మాత‌ల‌కు డ‌బ్బులు రావు. నిర్మాత‌ల‌కు.. డిస్ట్రిబ్యూట‌ర్స్‌, ఎగ్జిబిట‌ర్స్‌కు మ‌ధ్య రిలేష‌న్ అనేది భార్యాభ‌ర్త‌ల సంబందంలాంటిది. కాబ‌ట్టి మేం నిర్మాత‌ల‌ను స‌పోర్ట్ చేయ‌మ‌ని రిక్వెస్ట్ చేస్తున్నాం. మేం ఓటీటీ ఛానెల్స్‌కు వ్య‌తిరేకం కాదని, వారి బిజినెస్ వారిది. పండుగ‌ల‌కు సినిమాల‌ను ఓటీటీల్లో విడుద‌ల చేయ‌కండి. ల‌వ్‌స్టోరి సినిమాను సాఫీగా విడుద‌ల‌య్యేలా చూడండని అన్నారు.

నిర్మాత చదలవాడ మాట్లాడుతూ రామారావు, నాగేశ్వరరావు ఇప్పుడు లేకపోయినా వాళ్ళ సినిమాలు ఆడిన థియేటర్స్ ఇప్పటికీ ఉన్నాయని, నిర్మాతలు డిస్ట్రిబ్యూటర్స్ ఎగ్జిబిటర్స్ మధ్య అవినాభావ సంబంధం ఉందని, సినిమా అనుభూతి అనేది ఓటీటీ కన్నా థియేటర్ లోనే బాగుంటుందని, సెప్టెంబర్ 10న లవ్ స్టోరీ రిలీజ్ అవుతున్నప్పుడు టక్ జగదీష్ సినిమాను అదే రిలీజ్ చెయ్యడం కరెక్ట్ కాదని అన్నారు.

శ్రీధర్ మాట్లాడుతూ నా సినిమా థియేటర్‌లో రిలీజ్ చేయడమే నాకు ఇష్టం అన్న నాని ఇప్పుడు నిర్మాతల ఇష్టం అంటున్నారని, థియేటర్స్ బాగుంటేనే నిర్మాతలు బాగుంటారు. ఇలా అయితే ఓటీటీ వైపు వెళ్ళే నిర్మాతలకు తగిన సమాధానం చెబుతామని, హీరోయిజం అంటే థియేటర్‌లోనే కనపడుతుందని, ఓటీటీలో కనపడదని అన్నారు.

బాల గోవింద్ రాజ్ మాట్లాడుతూ బాహుబలి లాంటి మూవీ ఓటీటీలో రిలీజ్ అయితే ఇంత పేరు వచ్చేదా ఓటీటీ వలన టాలీవుడ్‌కి చాలా నష్టమను, మేము నిర్మాతలకు అక్టోబర్ వరకు ఆగమని చెప్పాము. వాళ్లు ఓటీటీలో కాకుండా సినిమాల‌ను థియేటర్స్ లోనే రిలీజ్ చెయ్యాలని అన్నారు.

సంబంధిత సమాచారం :