ముఖ్య అంశాలు

• ఐఓఎస్, ఆండ్రాయిడ్ యూజర్ల కోసం వాట్సాప్ త్వరలో వ్యూ వన్స్ టెక్స్ట్ మెసేజ్‌లు, మ్యాసేజ్ షెడ్యూలింగ్ లాంటి సాలిడ్ ఫీచర్లను తీసుకురాబోతోంది.
• గుర్తు తెలియని వ్యక్తుల నుంచి వచ్చే స్కామ్ మెసేజ్‌లను ముందుగానే పసిగట్టి యూజర్లను అలర్ట్ చేసే సరికొత్త సెక్యూరిటీ ఫీచర్ ఆండ్రాయిడ్‌లో టెస్టింగ్ దశలో ఉంది.
• వాట్సాప్, ఇన్‌స్టాగ్రామ్, ఫేస్‌బుక్‌లకు ఒకే సబ్‌స్క్రిప్షన్‌తో ప్రీమియం సర్వీసులు పొందేలా ‘మెటా వన్’ అనే ప్లాన్‌ను కూడా సంస్థ సిద్ధం చేస్తోంది.

వాట్సాప్ యూజర్ల కోసం మెటా సంస్థ ఎప్పటికప్పుడు కొత్త ఫీచర్లను పరిచయం చేస్తూనే ఉంటుంది. ఇప్పుడు ఆండ్రాయిడ్, ఐఓఎస్ ప్లాట్‌ఫామ్స్‌లో యూజర్ల ప్రైవసీని, సౌలభ్యాన్ని మరింత పెంచేలా కొన్ని అద్భుతమైన ఫీచర్లను తీసుకురావడానికి రెడీ అవుతోంది. ప్రస్తుతం బీటా టెస్టింగ్‌లో ఉన్న ఈ అప్‌డేట్స్ త్వరలోనే అందరికీ అందుబాటులోకి రానున్నాయి. ఇంతకీ వాట్సాప్ తీసుకొస్తున్న ఆ కొత్త ఫీచర్లు ఏంటో ఓసారి చూద్దాం.

టెక్స్ట్ మెసేజ్‌లకు వ్యూ-వన్స్.. స్కామ్‌లకు చెక్

రోజూ వాట్సాప్‌లో గుర్తు తెలియని నంబర్ల నుంచి వచ్చే ఫేక్ మెసేజ్‌లు, లింక్స్‌తో చాలామంది ఇబ్బంది పడుతుంటారు. దీనికి చెక్ పెట్టేందుకు వాట్సాప్ సరికొత్త ‘స్కామ్ అలర్ట్’ సిస్టమ్‌ను డెవలప్ చేస్తోంది. కొత్త కాంటాక్ట్ నుంచి ఏదైనా అనుమానాస్పద మెసేజ్ రాగానే, యూజర్ రిప్లై ఇచ్చేలోపే ఈ సిస్టమ్ అలర్ట్ చేస్తుంది. డివైజ్‌లోనే ఆన్-డివైస్ అనాలిసిస్ ద్వారా ఇది పనిచేస్తుంది కాబట్టి యూజర్ల ప్రైవసీకి ఎలాంటి ఢోకా ఉండదు. అలాగే ఇప్పటివరకు కేవలం ఫోటోలు, వీడియోలకు మాత్రమే ఉన్న ‘వ్యూ వన్స్’ (View Once) ఆప్షన్‌ను ఇకపై టెక్స్ట్ మెసేజ్‌లకు కూడా ఇవ్వబోతున్నారు. అంటే మనం పంపిన మెసేజ్‌ను అవతలి వారు ఒక్కసారి చూడగానే అది ఆటోమెటిక్‌గా డిలీట్ అవుతుంది. ఆ మెసేజ్‌ను కాపీ చేయడానికి, స్క్రీన్ షాట్ తీయడానికి లేదా ఫార్వర్డ్ చేయడానికి అస్సలు కుదరదు.

మెసేజ్ షెడ్యూలింగ్.. ఒకే ప్లాన్‌లో అన్నీ!

టైప్ చేయడం కన్నా వాయిస్ నోట్స్ ఎక్కువగా పంపేవాళ్ల కోసం ఆండ్రాయిడ్‌లో ‘వాయిస్ నోట్ విడ్జెట్’ రాబోతోంది. దీన్ని నేరుగా మొబైల్ హోమ్ స్క్రీన్ మీద పెట్టుకుంటే, వాట్సాప్ యాప్ ఓపెన్ చేయకుండానే డైరెక్ట్‌గా వాయిస్ రికార్డ్ చేసి ఫ్రెండ్స్‌కు పంపొచ్చు. ఇక ఎప్పటినుంచో ఎదురుచూస్తున్న ‘మెసేజ్ షెడ్యూలింగ్’ ఫీచర్ కూడా ఐఫోన్ యూజర్ల కోసం టెస్టింగ్ దశలో ఉంది. అర్ధరాత్రి ఎవరికైనా పుట్టినరోజు శుభాకాంక్షలు చెప్పాలన్నా, ముఖ్యమైన బిజినెస్ మెసేజ్‌లు నిర్ణీత సమయంలో పంపాలన్నా ముందుగానే డేట్, టైమ్ సెట్ చేసుకుంటే చాలు.. ఆ టైమ్‌కి వాట్సాప్ దానంతట అదే మెసేజ్ పంపుతుంది.

వీటితో పాటు మెటా సంస్థ ‘మెటా వన్’ (Meta One) పేరుతో ఒకే సబ్‌స్క్రిప్షన్ ప్లాన్‌ను తీసుకురావాలని చూస్తోంది. ఈ ప్లాన్ తీసుకుంటే వాట్సాప్, ఇన్‌స్టాగ్రామ్, ఫేస్‌బుక్ యాప్స్‌లో ఉండే ప్రీమియం ఫీచర్లన్నీ ఒకేసారి వాడుకునే అవకాశం ఉంటుంది. ఒక్కో యాప్‌కి విడివిడిగా డబ్బులు కట్టాల్సిన అవసరం ఉండదు. ఈ ఫీచర్లన్నీ టెక్స్ట్ మెసేజింగ్ అనుభవాన్ని మరింత స్మార్ట్‌గా, సెక్యూర్‌గా మార్చబోతున్నాయని టెక్ నిపుణులు చెబుతున్నారు.