ముఖ్య అంశాలు
- ‘మా ఇంటి బంగారం’ ప్రీ రిలీజ్ ఈవెంట్లో సమంతకు పబ్లిక్గా ఐ లవ్ యూ చెప్పాలని రాజ్ నిడిమోరును యాంకర్ సుమ ఆటపట్టించారు.
- ఇప్పటికే ఫ్యాన్స్ అంతా ఆమెకు అదే చెబుతున్నారని, తను కొత్తగా చెప్పడానికి ఏమీ లేదంటూ రాజ్ ఫన్నీగా బదులిచ్చారు.
- ఒక నటిగా సమంత డెడికేషన్ చూసి తాను ఆశ్చర్యపోయానని, సింగిల్ టేక్లోనే అద్భుతమైన పర్ఫార్మెన్స్ ఇస్తుందని రాజ్ ప్రశంసల వర్షం కురిపించారు.
సమంత రూత్ ప్రభు లీడ్ రోల్ చేస్తూ, స్వయంగా నిర్మించిన లేటెస్ట్ మూవీ ‘మా ఇంటి బంగారం’. నందిని రెడ్డి డైరెక్ట్ చేసిన ఈ సినిమా జూన్ 19న ప్రేక్షకుల ముందుకు రాబోతోంది. ఈ క్రమంలో హైదరాబాద్లో నిర్వహించిన ప్రీ రిలీజ్ ఈవెంట్ చాలా సందడిగా సాగింది. ముఖ్యంగా సమంత భర్త, ప్రముఖ ఫిల్మ్ మేకర్ రాజ్ నిడిమోరు ఈ ఈవెంట్లో చేసిన కామెంట్స్ ఇప్పుడు సోషల్ మీడియాలో వైరల్ అవుతున్నాయి.
స్టేజ్పై రాజ్ నిడిమోరు మాట్లాడుతున్న సమయంలో ఫ్యాన్స్ నుంచి భారీగా అరుపులు వినిపించాయి. వారు ఏం అరుస్తున్నారో తనకు సరిగ్గా అర్థం కావడం లేదని రాజ్ అనగానే, యాంకర్ సుమ తనదైన స్టైల్లో ఎంట్రీ ఇచ్చారు. “స్టేజ్పై మీ భార్య సమంతకు ఒకసారి ‘ఐ లవ్ యూ’ చెప్పాలని ఆడియన్స్ అడుగుతున్నారు” అంటూ సుమ ఆటపట్టించారు. అయితే, రాజ్ దీనికి చాలా స్మార్ట్గా ఆన్సర్ ఇచ్చారు. “ఇప్పటికే ఇక్కడ చాలా మంది ఆమెకు ఐ లవ్ యూ చెప్పేశారు. అక్కడి నుంచి కూడా అదే అరుస్తున్నారు. కాబట్టి ఇప్పుడు నేను కొత్తగా చెప్పేదేమీ లేదు” అంటూ నవ్వుతూ తప్పించుకున్నారు. రాజ్ ఇచ్చిన కౌంటర్తో అక్కడున్న వారంతా నవ్వేశారు.
నటిగా సమంత అంటే ఇష్టం..
వ్యక్తిగత విషయాలను పక్కనబెట్టి, ప్రొఫెషనల్గా సమంత యాక్టింగ్ గురించి రాజ్ నిడిమోరు ప్రశంసల వర్షం కురిపించారు. “మా ఇంటి బంగారం షూటింగ్ సమయంలో ఆమె యాక్టింగ్ చూసి నిజంగా ఆశ్చర్యపోయాను. ఒక సీన్ రాసిన తర్వాత, సెట్స్లో దాన్ని సమంత ఫస్ట్ టేక్లోనే అద్భుతంగా పండించేది. ఆమె ఎంత గొప్ప నటి అనేది నాకు అప్పుడే అర్థమైంది. ప్రతిసారి ఆమెకు కొత్త సీన్ ఇచ్చినప్పుడల్లా, నేను మునుపెన్నడూ చూడని కొత్త వేరియేషన్స్ చూపిస్తుంది” అని రాజ్ చెప్పుకొచ్చారు. పక్కనే ఉన్న సమంత వైపు చూస్తూ.. “ఇప్పుడు నేను నీతో ఒక యాక్టర్గానే మాట్లాడుతున్నా” అనడం అక్కడున్న వారిని ఆకట్టుకుంది. బాలీవుడ్లో ఎన్నో ప్రాజెక్ట్స్ చేసినప్పటికీ, తెలుగు ప్రేక్షకుల్లో ఉన్న ఈ ఉత్సాహం తనకు కొత్త ఎనర్జీని ఇస్తోందని ఆయన అన్నారు.
లక్ కాదు.. అదంతా హార్డ్ వర్క్
ఇదే వేదికపై సమంత మాట్లాడుతూ.. రాజ్, డీకేల వర్కింగ్ స్టైల్ గురించి ప్రత్యేకంగా ప్రస్తావించారు. వాళ్ల డిక్షనరీలో లక్ అనే పదమే ఉండదని, సెట్స్లో ఎప్పుడూ కష్టపడి పనిచేస్తూనే ఉంటారని ఆమె కొనియాడారు. వారి దగ్గరే తాను కష్టపడటం నేర్చుకున్నానని చెబుతూ సమంత మురిసిపోయారు. ‘ట్రలాలా మూవింగ్ పిక్చర్స్’ బ్యానర్పై నిర్మాతగా బాధ్యతలు తీసుకున్న తర్వాత తనపై కాస్త ప్రెజర్ పెరిగిందని, అయితే డైరెక్టర్ నందిని రెడ్డితో పాటు చిత్రయూనిట్ అంతా ఎంతో సపోర్ట్ చేశారని ఆమె గుర్తుచేసుకున్నారు. ఒక సినిమా హిట్ అయితే క్రెడిట్ అంతా స్టార్స్కి వెళుతుందని, కానీ దాని వెనుక ఎంతో మంది టెక్నీషియన్స్ కష్టం ఉంటుందని సమంత చెప్పుకొచ్చారు.