సమీక్ష : జై సింహ – అభిమానులను మెప్పించే బాలయ్య

Jai Simha movie review

విడుదల తేదీ : జనవరి 12, 2018

123తెలుగు.కామ్ రేటింగ్ : 3/5

నటీనటులు : బాలక్రిష్ణ, నయనతార, హరిప్రియ, నటాషా దోషి

దర్శకత్వం : కె.ఎస్. రవికుమార్

నిర్మాత : సి.కళ్యాణ్

సంగీతం : చిరంతన్ భట్

సినిమాటోగ్రఫర్ : రామ్ ప్రసాద్

ఎడిటర్ : ప్రవీణ్ ఆంటోనీ

నట సింహం నందమూరి బాలక్రిష్ణ నటించిన 102వ చిత్రం ‘జై సింహ’ భారీ అంచనాల నడుమ ఈరోజే విడుదలైంది. కె.ఎస్. రవికుమర్ డైరెక్ట్ చేసిన ఈ చిత్రం ఎలా ఉందో ఇప్పుడు చూద్దాం..

కథ:

నరసింహ (బాలక్రిష్ణ) అప్పుడే పుట్టిన తన కొడుకుతో వైజాగ్ వదిలేసి అనేక ప్రాంతాలు, రాష్ట్రాలు తిరుగుతూ చివరికి కుంభకోణంకు చేరుకుంటాడు. అలా అక్కడే డ్రైవర్ గా పని చేసుకుంటున్న అతనికి ఒక ఇన్సిడెంట్ ద్వారా గతంలో తాను ప్రేమించిన అమ్మాయి గౌరి (నయనతార) ఎదురవుతుంది.

కానీ అప్పటికే ఆమె అతనిపై ద్వేషం పెంచుకుని, అసహ్యించుకునే స్థాయిలో ఉంటుంది. అసలు నరసింహ కొడుకుతో సహా వైజాగ్ వదిలి ఎందుకు వెళ్ళిపోయాడు ? ప్రాణంగా ప్రేమించిన గౌరి అతన్ని ఎందుకు శత్రువులా చూస్తుంది ? అతని గతమేమిటి ? అనేదే సినిమా.

ప్లస్ పాయింట్స్ :

సినిమాకు ప్రధాన ప్లస్ పాయింట్ నట సింహ బాలక్రిష్ణే. సినిమా ఆద్యంతం అభిమానించే వాళ్ళ కోసం ఎంతటి త్యాగానికైనా వెనుకాడని నరసింహ పాత్రలో బాలయ్య జీవించారు. ఎక్కడా అభినయాన్ని వేరే కోణంలోకి తీసుకెళ్లకుండా ఒకేలా నటించి మెప్పించారు. ముఖ్యంగా క్లైమాక్స్ సన్నివేశంలో ఆయన నటనకు చప్పట్లు కొట్టాల్సిందే. ఫైట్స్, డైలాగ్స్, డ్యాన్సుల్లో కూడా తన మాస్ మార్క్ ప్రదర్శించి అక్కడ కూడా ఆకట్టుకుని హీరోగా సినిమాకు ఎంత చేయాలో అంతా చేశారు బాలయ్య.

ఇక సినిమా విషయానికొస్తే ఆరంభం బాగానే ఉంది. ఫస్టాఫ్ కుంభకోణం బ్యాక్ డ్రాప్లో వచ్చే బ్రహ్మాణుల గొప్పతనాన్ని, ప్రాముఖ్యతను వివరించే సన్నివేశం చాలా బాగుంది. అందులో కట్ లేకుండా బాలయ్య చెప్పిన డైలాగ్ ఔరా అనిపిస్తుంది. అలాగే ఇంటర్వెల్ బ్లాక్ లో రివీల్ అయ్యే ట్విస్ట్ కూడా సెకండాఫ్ పై ఆసక్తిని రేకెత్తించింది.

ద్వితియార్థంలో బాలయ్య గత జీవితం తాలూకు ముఖ్యమైన ఘటనలు, అతనెందుకు వైజాగ్ వదిలి వచ్చేశాడనే అంశం కొంత బాగానే ఉంది. అలాగే క్లైమాక్స్ సన్నివేశమైతే గుండెల్ని కొంత బరువెక్కించి బయటికిపంపుతుంది. పైన చెప్పినట్టు అందులో బాలయ్య నటన, సన్నివేశం తాలూకు దర్శకుడు సృష్టించిన పరిస్థితులు బాగుంటాయి.

మైనస్ పాయింట్స్ :

సినిమాలో కొత్త కథంటూ ఏముండదు. బాలక్రిష్ణ గత హిట్ సినిమాల తాలూకు ఛాయలు ప్రతిచోటా కనిపిస్తూనే ఉంటాయి. దాంతో సినిమా చూస్తున్నంతసేపు ప్రేక్షకుడికి పెద్దగా ఎగ్జైట్ ఫీలయ్యే ఛాన్స్ దొరకదు. అంతేగాక కె.ఎస్. రవికుమార్ స్క్రీన్ ప్లే కూడా పాత తరహాలోనే ముందు హీరో ప్రస్తుతం, ఆ తర్వాత అతని గతం, చివర్లో మళ్ళీ ప్రస్తుతం అన్నట్టే ఉంటుంది కానీ ఎక్కడా కొత్త పోకడ, వేగం కనిపించదు.

అలాగే ఫస్టాఫ్లో వచ్చే బ్రహ్మానందం తాలూకు కామెడీ ఓల్డ్ ఫార్మాట్లోనే ఉంటూ ఒకానొక దశలో ఇక చాలు అనే ఫీలింగ్ ను కూడా కలిగిస్తుంది. కథానానికి ముఖ్యమైన ప్రతినాయకులు, హీరో మధ్య వైరం చాలా బలహీనంగా ఉండటంతో బాలయ్య పాత్రలో కూడా తీవ్రత కొంత లోపించింది. ఈ విషయంలో కొంచెం జాగ్రత్త వహించి ఉంటే ఫలితం ఇంకాస్త బెటర్ గా ఉండేది.

సెకండాఫ్లో వచ్చే ముఖ్యమైన బాలయ్య గత జీవితం చెప్పడానికి, వినడానికి బాగానే ఉంది కానీ చూడటానికి అంత ఆసక్తికరంగా, ఎగ్రెసివ్ గా లేదు. ముఖ్యంగా కథానాయకుడి పాత్ర స్వభావాన్ని, అతని లవ్ ట్రాక్ ను వివరించడానికి తీసిన సన్నివేశాలు మరీ రొటీన్ గా ఉండి కొంత బోర్ ఫీలయ్యేలా చేస్తాయి. కొందరు ముఖ్యమైన నటుల నటన అస్సలు బాగోలేదు.

సాంకేతిక విభాగం :

రచయిత ఏ.ఎం.రత్నం సినిమాకు అందించిన కథ పాతదే కానీ అందులోని కీలకమైన మలుపులు, సన్నివేశాలు బాగున్నాయి. బాలయ్య పాత్రకు ఆయన రాసిన డైలాగ్స్ కనెక్టయ్యాయి. అలాగే దర్శకుడు కె.ఎస్. రవికుమార్ గారి స్క్రీన్ ప్లే, టేకింగ్లో కూడా కొత్తదనం, వేగం పెద్దగా కనబడక జస్ట్ ఓకే అనే స్థాయిలోనే ఉంది.

చిరంతన్ భట్ అందించిన పాటల సంగీతం, బ్యాక్ గ్రౌండ్ స్కోర్ రెండూ యావరేజ్ గానే ఉన్నాయి. రామ్ ప్రసాద్ సినిమాటోగ్రఫీ పద్దతిగానే ఉన్నా కొంత పాతబడిన సినిమా చూస్తున్నామనే ఫీలింగ్ కలిగింది. ప్రవీణ్ ఆంటోనీ ఎడిటింగ్ ద్వారా కొన్ని అనవసరమైన సన్నివేశాలని తొలగించి ఉండాల్సింది. నిర్మాత సి.కళ్యాణ్ పాటించిన నిర్మాణ విలువలు బాగున్నాయి.

తీర్పు :

ఈ సంక్రాంతికి ‘జై సింహ’ తో బరిలోకి దిగిన బాలక్రిష్ణ పర్వాలేదనే చిత్రాన్ని ప్రేక్షకులకు అందించారు. అభిమానులు గర్వపడే స్థాయిలో ఉండే బాలక్రిష్ణ నటన, ఇంటర్వెల్ బ్లాక్, హృదయాలను హత్తుకునే ఎమోషనల్ క్లైమాక్స్, కొన్ని బలమైన సన్నివేశాలు ఈ సినిమాలో మెప్పించే అంశాలు కాగా పాత తరహా కథ, నెమ్మదిగా సాగే కథనం, తేలిపోయిన ప్రతినాయకుల పాత్రలు వంటి బలహీనతలు నిరుత్సాహానికి గురిచేస్తాయి. మొత్తం మీద కొంత పాతగా, రొటీన్ గా ఉన్న ఈ ‘జై సింహ’ చిత్రం అభిమానులను మెప్పించేలా సాధారణ ప్రేక్షకులకు పర్వాలేదనిపించేలా ఉంది.

123telugu.com Rating : 3/5

Reviewed by 123telugu Team

Click here for English Review

 
Like us on Facebook