ఆసియా కప్ రైజింగ్ స్టార్స్ 2025 టోర్నీలో టీమిండియా ప్రయాణం విషాదకరంగా ముగిసింది. శుక్రవారం దోహా వేదికగా జరిగిన తొలి సెమీ ఫైనల్‌లో బంగ్లాదేశ్ ‘ఏ’ జట్టు, ఇండియా ‘ఏ’ జట్టుపై సంచలన విజయం సాధించింది. నరాలు తెగే ఉత్కంఠ మధ్య సాగిన ఈ మ్యాచ్‌లో నిర్ణీత 20 ఓవర్లలో ఇరు జట్ల స్కోర్లు సమం కావడంతో ఫలితం ‘సూపర్ ఓవర్’ (Super Over)కు దారితీసింది. అక్కడ భారత బ్యాటర్లు ఘోరంగా విఫలం కావడంతో ఫైనల్ బెర్తు చేజారింది.

భారీ స్కోర్ల సమరం.. హోరాహోరీ పోరు

తొలుత బ్యాటింగ్ చేసిన బంగ్లాదేశ్ ‘ఏ’ జట్టు నిర్ణీత 20 ఓవర్లలో 6 వికెట్ల నష్టానికి 194 పరుగుల భారీ స్కోరు చేసింది. బంగ్లా ఓపెనర్ హబీబుర్ రెహమాన్ (65), మెహరోబ్ (48) అద్భుతమైన బ్యాటింగ్‌తో చెలరేగారు.

అనంతరం 195 పరుగుల భారీ లక్ష్యంతో బరిలోకి దిగిన ఇండియా ‘ఏ’ జట్టు కూడా దీటుగా బదులిచ్చింది. యువ సంచలనం వైభవ్ సూర్యవంశీ కేవలం 15 బంతుల్లోనే 38 పరుగులు చేసి ఇన్నింగ్స్‌కు అదిరిపోయే ఆరంభాన్ని ఇచ్చాడు. ప్రియాంష్ ఆర్య (44), జితేష్ శర్మ (33), నెహాల్ వధేరా (32) కూడా రాణించడంతో మ్యాచ్ చివరి బంతి వరకు ఉత్కంఠభరితంగా సాగింది. చివరి బంతికి భారత్ స్కోరు కూడా సరిగ్గా 194 పరుగుల వద్ద ఆగడంతో మ్యాచ్ ‘టై’ అయింది.

సూపర్ ఓవర్‌లో ఏం జరిగిందంటే?

ఫలితాన్ని తేల్చడానికి నిర్వహించిన సూపర్ ఓవర్‌లో ఇండియా ‘ఏ’ జట్టు పూర్తిగా తడబడింది. బంగ్లాదేశ్ బౌలర్ రిపోన్ మండల్ అద్భుతంగా బౌలింగ్ చేసి, మొదటి రెండు బంతుల్లోనే రెండు వికెట్లు పడగొట్టాడు. దీంతో ఇండియా ఒక్క రన్ కూడా చేయకుండానే ఆలౌట్ అయ్యింది.

కేవలం 1 పరుగు లక్ష్యంతో బరిలోకి దిగిన బంగ్లాదేశ్ కూడా తొలి బంతికే వికెట్ కోల్పోయింది. భారత బౌలర్ సుయాష్ శర్మ వేసిన మొదటి బంతికి యాసిర్ అలీ క్యాచ్ ఇచ్చి అవుటయ్యాడు. అయితే, ఆ తర్వాత సుయాష్ వేసిన బంతిని అంపైర్ ‘వైడ్’ గా ప్రకటించడంతో బంగ్లాదేశ్ సునాయాసంగా విజయం సాధించి ఫైనల్‌కు (Final) దూసుకెళ్లింది.

ఈ ఓటమితో ఇండియా ‘ఏ’ జట్టు టోర్నీ నుండి నిష్క్రమించగా, బంగ్లాదేశ్ టైటిల్ పోరుకు సిద్ధమైంది. సూపర్ ఓవర్‌లో అద్భుత బౌలింగ్‌తో మెరిసిన రిపోన్ మండల్ ‘ప్లేయర్ ఆఫ్ ది మ్యాచ్’గా నిలిచాడు.