బాలీవుడ్ బాక్సాఫీస్ దగ్గర సంచలనాలు సృష్టిస్తున్న ‘ధురంధర్ ది రివెంజ్’ (ధురంధర్ 2) సినిమాపై ఎట్టకేలకు ఒక ఖాన్ స్పందించారు. ఈ సినిమా భారీ సక్సెస్ అందుకోవడంతో దేశవ్యాప్తంగా మూవీ టీమ్పై ప్రశంసలు దక్కుతున్నాయి. తాజాగా మిస్టర్ పర్ఫెక్షనిస్ట్ ఆమిర్ ఖాన్ ఈ మూవీ విజయంపై ఆసక్తికరమైన కామెంట్స్ చేశారు. అయితే, ఇక్కడే ఆయనో చిన్న ట్విస్ట్ ఇచ్చారు.
సినిమా చూడకపోయినా..
నిజానికి ఆమిర్ ఖాన్ ఇంకా ‘ధురంధర్ 2’ సినిమా చూడలేదు. ఇదే విషయాన్ని ఆయన స్వయంగా వెల్లడించారు. “నేను ఇంకా ఆ సినిమా చూడలేదు. కానీ సినిమా గురించి అంతా చాలా గొప్పగా చెబుతున్నారు. బయట ఎక్కడ విన్నా ప్రశంసలే వినిపిస్తున్నాయి” అని ఆమిర్ చెప్పుకొచ్చారు. కేవలం ఈ సీక్వెల్ మాత్రమే కాదు.. మొదటి భాగం ‘ధురంధర్ 1’ కూడా పెద్ద హిట్ అని ఆయన గుర్తుచేశారు.
ఈ రెండు సినిమాలు అద్భుతమైన వసూళ్లు రాబట్టాయని, ప్రేక్షకుల నుంచి అసాధారణమైన స్పందన తెచ్చుకున్నాయని ఆమిర్ ఖాన్ కొనియాడారు. ఈ సందర్భంగా ‘ధురంధర్’ చిత్ర బృందానికి ఆయన తన శుభాకాంక్షలు తెలియజేశారు. సినిమా చూడకపోయినా, దాని ఇంపాక్ట్ ఏంటో ఆమిర్ ఖాన్ లాంటి స్టార్ హీరో ఓపెన్గా మెచ్చుకోవడం ఇప్పుడు సోషల్ మీడియాలో వైరల్గా మారింది.