తన విలక్షణ నటనతో, కామెడీ టైమింగ్తో తెలుగు సినీ పరిమశ్రమలో గొప్ప గుర్తింపు సంపాదించుకున్న నటుడు కలెక్షన్ కింగ్ మోహన్ బాబు. ఇక ఈతరంలో తనదైన కామెడితో ప్రేక్షకులకు గిలిగింతలు పెట్టి నవ్వించే కామెడీ స్టార్ అల్లరి నరేష్. వీరిద్దరూ కలిసి ఓ సినిమా చేస్తే ఎలా ఉంటుంది? ఆ ఆలోచనే ఆసక్తికరంగా ఉంది కదూ! త్వరలోనే ఈ కాంబినేషన్ కార్యరూపం దాల్చనుంది. మోహన్ బాబు, అల్లరి నరేష్ల కాంబినేషన్లో త్వరలోనే ఓ సినిమా ప్రారంభం కానుంది.
అటు హీరోగా సినిమాలు చేస్తూనే నిర్మాతగానూ విభిన్న సినిమాలను రూపొందిస్తూ వస్తున్న మంచు విష్ణు 24 ఫ్రేమ్స్ ఫ్యాక్టరీ పతాకంపై ఈ సినిమాను నిర్మించనున్నారు. గతంలో ‘బొమ్మన బ్రదర్స్ చందన సిస్టర్స్’, ‘ఢమరుకం’ వంటి సినిమాలతో మెప్పించిన దర్శకుడు శ్రీనివాసరెడ్డి ఈ క్రేజీ కాంబినేషన్ సినిమాకు దర్శకత్వం వహించనున్నారు. ఇక త్వరలోనే ఈ సినిమా సెట్స్పైకి వెళ్ళనుందని నిర్మాత మంచు విష్ణు సినిమా అనౌన్స్మెంట్ సందర్భంగా తెలిపారు.