ప్రముఖ నిర్మాత, దర్శకుడు తుమ్మలపల్లి రామసత్యనారాయణ ప్రధాన పాత్రలో నటిస్తూ, స్వయంగా దర్శకత్వం వహించి నిర్మించిన ‘యమ కింకరుడు’ చిత్ర ట్రైలర్ను సీనియర్ నిర్మాత కె.ఎస్. రామారావు ఆవిష్కరించారు. తెలుగు చిత్ర పరిశ్రమలోనే తొలిసారిగా పూర్తిస్థాయి ఆర్టిఫిషియల్ ఇంటెలిజెన్స్ (AI) సాంకేతికతతో ఈ సినిమాను తెరకెక్కించడం విశేషం. ట్రైలర్ బాగుందని అభినందించిన కె.ఎస్. రామారావు, కొత్త ప్రయోగంతో ముందుకు వచ్చిన చిత్ర బృందానికి శుభాకాంక్షలు తెలిపారు.
ఈ చిత్రంలో సీనియర్ నటుడు సుమన్ ఒక కీలక పాత్రలో నటించారు. ఆయన పాత్ర సినిమాకు ప్రత్యేక ఆకర్షణగా నిలుస్తుందని కె.ఎస్. రామారావు పేర్కొన్నారు. సుమన్ రాకతో చిత్ర స్థాయి మరింత పెరిగిందని తుమ్మలపల్లి రామసత్యనారాయణ వెల్లడించారు. సాంకేతికంగా, కథాపరంగా ఈ చిత్రం ప్రేక్షకులకు ఒక సరికొత్త అనుభూతిని అందిస్తుందని ఆశాభావం వ్యక్తం చేశారు.
కథ, కథనం, దర్శకత్వంతో పాటు నిర్మాణ బాధ్యతలను తుమ్మలపల్లి రామసత్యనారాయణే పర్యవేక్షించారు. కాగా, ఈ సినిమా విడుదల తేదీని త్వరలోనే అధికారికంగా ప్రకటించనున్నట్లు చిత్ర బృందం తెలిపింది.