టాలీవుడ్ యంగ్ హీరో తేజ సజ్జా తన కెరీర్ను చాలా తెలివిగా ప్లాన్ చేసుకుంటున్నాడు. కేవలం వెండితెరకే పరిమితం కాకుండా డిజిటల్ ప్లాట్ఫామ్స్ పై కూడా గట్టిగా ఫోకస్ పెట్టాడు. ఈ క్రమంలోనే ప్రముఖ ఓటీటీ సంస్థ అమెజాన్ ప్రైమ్ వీడియోలో రాబోతున్న ‘ది ట్రైటర్స్ తెలుగు’ (The Traitors Telugu) షోకి అతను హోస్ట్గా మారాడు. చైల్డ్ ఆర్టిస్ట్గా కెరీర్ మొదలుపెట్టి, పాన్ ఇండియా రేంజ్లో గుర్తింపు తెచ్చుకున్న ఈ కుర్ర హీరో.. ఇప్పుడు డిజిటల్ స్పేస్లోనూ తన మార్క్ వేసేందుకు సిద్ధమయ్యాడు.
ప్రేక్షకులకు మరింత చేరువగా..
సాధారణంగా హీరోలు తమ సినిమా రిలీజ్ అయినప్పుడు మాత్రమే జనాల్లో ఎక్కువగా కనిపిస్తారు. కానీ, నిరంతరం ప్రేక్షకులతో టచ్లో ఉండాలనేది తేజ సజ్జా ఆలోచన. అందుకే ప్రైమ్ వీడియో లాంటి పెద్ద ప్లాట్ఫామ్తో చేతులు కలిపాడు. ఇలాంటి ఇంటర్నేషనల్ ఫార్మాట్ షోకి హోస్ట్గా వ్యవహరించడం వల్ల అతని పాపులారిటీ మరింత పెరిగే అవకాశం స్పష్టంగా కనిపిస్తోంది.
రీసెంట్గా జరిగిన ప్రైమ్ వీడియో ఈవెంట్లో బాలీవుడ్ స్టార్ మేకర్ కరణ్ జోహార్తో కలిసి తేజ సజ్జా వేదిక పంచుకోవడం అందరి దృష్టినీ ఆకర్షించింది. ఒకవైపు థియేట్రికల్ సినిమాలతో బిజీగా ఉంటూనే, మరోవైపు ఓటీటీ ద్వారా ప్రతి ఇంట్లోకి చేరుకోవాలన్న అతని వ్యూహం అద్భుతంగా వర్కౌట్ అవుతోంది. తన చుట్టూ ఉన్న అవకాశాలను సరైన సమయంలో వాడుకుంటూ తేజ సజ్జా ఇండస్ట్రీలో తనకు తిరుగులేదని నిరూపించుకుంటున్నాడు.