ఇటీవల కాలంలో థియేటర్లకు వెళ్లి ఒక పెద్ద సినిమా చూడాలంటే సామాన్య కుటుంబానికి అది భారంగా మారుతోంది. టికెట్ ధరలు(Ticket Prices) ఆకాశాన్ని తాకడం వెనుక నిర్మాతలు చెబుతున్న కారణం – “సినిమా గ్రాండియర్ మరియు భారీ నిర్మాణ వ్యయం”. కానీ లోతుగా ఆలోచిస్తే, ఇది కేవలం ఒక ముసుగు మాత్రమే. విజువల్ ఎఫెక్ట్స్, భారీ సెట్టింగ్స్ కోసం ఖర్చు చేస్తున్న దానికంటే, సినిమా బడ్జెట్లో సింహభాగం కేవలం హీరో మరియు దర్శకుల పారితోషికాలకే కేటాయించబడుతోంది. మీ కష్టార్జితాన్ని వెచ్చించి టికెట్ కొన్నప్పుడు, ఆ సినిమా సరైన వినోదాన్ని పంచకపోతే కలిగే నిరాశ వర్ణనాతీతం. నిజానికి, ఈ భారీ ధరల వెనుక ఉన్న అసలు కారణం నిర్మాణంపై ఉన్న మక్కువ కంటే, స్టార్ల భారీ డిమాండ్లే.
చేదు నిజాలు :
సోషల్ మీడియా వేదికగా సాగుతున్న ఫ్యాన్ వార్స్ పరిస్థితిని మరింత దిగజారుస్తున్నాయి. “మా హీరోకి వంద కోట్లు.. మీ హీరోకి డెబ్బై కోట్లు” అంటూ తమ అభిమాన నటుడు ఇండస్ట్రీలోనే అత్యధిక పారితోషికం తీసుకుంటున్నాడని అభిమానులు గర్వంగా ప్రచారం చేసుకుంటున్నారు. కానీ, ఈ భారీ అంకెలే రేపు తాము కొనే టికెట్ రేటును పెంచుతాయని వారు గమనించలేకపోతున్నారు. నిర్మాతలు హీరోలకు ఇచ్చే ప్రాధాన్యత వారి బాక్సాఫీస్ స్టామినాను బట్టే ఉంటుంది, అందులో సందేహం లేదు. కానీ, అది ఒక పరిమితిని మించినప్పుడు, ఆ భారం పరోక్షంగా ప్రేక్షకుడి పైనే పడుతుంది. అభిమానులు గొప్పగా చెప్పుకునే ఈ పారితోషికాలే నేడు సినిమా పరిశ్రమను సంక్షోభంలోకి నెడుతున్నాయి.
ఒక క్రేజీ కాంబినేషన్ సెట్ అవ్వగానే, మార్కెట్ లెక్కలతో సంబంధం లేకుండా పారితోషికాలు డిమాండ్ చేస్తున్నారు. ఉదాహరణకు, ఒక స్టార్ హీరో రూ.140 కోట్లు, దర్శకుడు రూ.100 కోట్లు అడిగితే, షూటింగ్ మొదలవ్వకముందే కేవలం ఇద్దరి కోసమే రూ. 250 కోట్లు ఖర్చు చేయాల్సి వస్తోంది. దీనికి ప్రొడక్షన్ ఖర్చులు, వడ్డీలు తోడైతే సినిమా విడుదల నాటికి బడ్జెట్ అదుపు తప్పుతోంది. నిర్మాత తన పెట్టుబడిని రికవరీ చేసుకోవడానికి డిస్ట్రిబ్యూటర్లకు భారీ రేట్లకు సినిమాను విక్రయిస్తున్నారు. డిస్ట్రిబ్యూటర్లు తమ వంతుగా టికెట్ రేట్లు పెంచమని ప్రభుత్వాన్ని ఆశ్రయిస్తున్నారు. అంటే, హీరోల విలాసవంతమైన పారితోషికాల కోసం సామాన్య ప్రేక్షకుడు తన అవసరాలను త్యాగం చేసి టికెట్ కొనాల్సిన పరిస్థితి ఏర్పడింది.
నివారణ మార్గం :
పరిశ్రమ ఆరోగ్యంగా ఉండాలంటే మార్పు అనివార్యం. అగ్ర హీరోలు తమ అభిమానుల పట్ల నిజమైన ప్రేమ ఉంటే, పారితోషికాలను తగ్గించుకోవాలి. గతంలో ఎందరో మహానుభావులు చేసినట్టుగా, ‘ప్రాఫిట్ షేరింగ్’ (లాభాల్లో వాటా) పద్ధతిని అనుసరించాలి. దీనివల్ల నిర్మాతపై భారం తగ్గుతుంది మరియు ఆ మిగిలిన సొమ్మును సినిమా క్వాలిటీ కోసం ఖర్చు చేయవచ్చు. అలాగే, నిర్మాతలు కూడా స్టార్లను అతిగా లాలించడం మాని, అశాస్త్రీయమైన డిమాండ్లకు “నో” చెప్పడం నేర్చుకోవాలి. అప్పుడే టికెట్ ధరలు(Ticket Prices) సామాన్యుడికి అందుబాటులోకి వస్తాయి మరియు సినిమా అనేది అందరికీ దొరికే అత్యంత చవకైన వినోదంగా మళ్లీ మారుతుంది.