అల్లు అర్జున్ యొక్క ‘అల వైకుంఠపురములో’ చిత్రం బాక్స్ ఆఫీస్ వద్ద కలెక్షన్ల వర్షం కురిపిస్తోంది. మొదటిరోజు నుంచి సూపర్ పాజిటివ్ టాక్ తో దూసుకెళ్తూ అద్భుతమైన కలెక్షన్స్ సాధిస్తోంది. బన్నీ కెరీర్లోనే అత్యధిక వసూళ్లను నమోదు చేసిన సినిమాగా ఈ సినిమా నిలిచింది. అందుకే కొద్ది రోజుల క్రితమే వైజాగ్‌ లో ఈ సినిమా సక్సెస్ మీట్ కూడా జరిగింది, అయితే అభిమానుల కోసం రేపు తిరుపతిలో ఈ సినిమా స్పెషల్ సక్సెస్ ఈవెంట్ కి సంబంధించి మరో ప్రత్యేక కార్యక్రమం జరగాల్సి ఉంది.
కానీ బన్నీ మేనమామ ముత్తంశెట్టి రాజేంద్ర ప్రసాద్‌ గుండెపోటుతో మరణించడంతో తిరుపతిలో జరగాల్సిన ఈ కార్యక్రమాన్ని చిత్రబృందం రద్దు చేసింది. ముత్తంశెట్టి రాజేంద్ర ప్రసాద్‌ అల్లు అర్జున్ తల్లి నిర్మలాదేవికీ స్వయానా అన్నయ్య అవుతారు. చిన్నప్పటి నుండి అల్లు అర్జున్ రాజేంద్ర ప్రసాద్‌ తో అత్యంత సన్నిహితంగా ఉండేవారు. ఆయన మరణం బన్నీకి తీరని లోటు.