తారాగణం: లిన్ లైశ్రామ్, సయాని గుప్తా, టెన్జింగ్ దల్హా, డాలీ అహ్లువాలియా, రోహన్ జోషి
దర్శకుడు: నికోలస్ ఖార్కోంగోర్
లాక్ డౌన్ రివ్యూ సిరీస్ లో హిందీ చిత్రం ఎక్సోన్ ని ఎంచుకోవడం జరిగింది. నికోలస్ ఖర్కోన్గర్ తెరకెక్కించిన ఈ చిత్రం ఎలా ఉందో సమీక్షలో చూద్దాం..
కథాంశం ఏమిటీ?
ఈశాన్య రాష్ట్రాలకు చెందిన చాన్బి(లిన్ లైశ్రమ్), ఉపాసన(సాయని గుప్తా) మీనమ్(అసేన్ల జమీర్) ఢిల్లీలోని ఓ మిడిల్ క్లాస్ ఇంటిలో అద్దెకు ఉంటారు. ఆ ఇంటి యజమానురాలైన (డాలీ అహ్లువాలియా) ప్రతి చిన్న విషయానికి ఆ ముగ్గురు అమ్మాయిలతో గొడవపడుతూ ఉంటుంది. ఓ రోజు మీనమ్ ఐ ఏ ఎస్ ఇంటర్వ్యూకి వెళుతుంది, అలాగే ఆమెకు పెళ్లి కూడా కుదురుతుంది. ఈ సంధర్భంగా ఆమెకు ఓ సర్ప్రైజ్ ట్రీట్ ఇవ్వాలని వారి సాంప్రదాయ వంటకమైన ఎక్సోన్ వండాలి అనుకుంటారు . పంది మాంసంతో చేసే ఆ వంటకం వండేటప్పుడు దుర్భరమైన వాసన వస్తుంది. దీనితో ఇంటి యజమానురాలితో పాటు, నైబర్స్ గొడవ చేయడంతో సమస్య మొదలవుతుంది. ఎలాగైనా ఎక్సోన్ వంటకాన్ని వండి తీరాలనుకున్న ఆ మిత్రుల కోరిక తీరిందా లేదా అనేది మిగతా కథ…
ఏమి బాగుంది?
భారత దేశంలో భాగమైనప్పటికీ రంగు, రూపు, ఆహారపు అలవాట్ల కారణం ఈశాన్య రాష్ట్ర ప్రజలకు ఢిల్లీ లాంటి ప్రదేశాలలో ఎదురయ్యే జాతి వివక్ష వంటి విషయాలను హ్యూమరిక్ అండ్ ఎమోషనల్ యాంగిల్ లో దర్శకుడు చక్కగా చెప్పాడు. కెరీర్ మరియు లైఫ్ కోసం ఢిల్లీ వచ్చిన ఆ ప్రాంత ప్రజల పట్ల స్థానిక ప్రజల ఆధిపత్యం, వేదింపులు వంటి విషయాలు ప్రస్తావించిన తీరు బాగుంది.
ఇక కఠిన సంధర్బాలలో స్నేహితులు ఒకరికొకరు ఎలా నిలబడతారనే చక్కని స్టోరీగా ఇందులో ఉంది. లిన్ మరియు సయాని గుప్త అద్భుత నటనతో ఆకట్టుకోగా రోహన్ జోషి మంచి ఎంటర్టైన్మెంట్ పంచారు.
ఏమి బాగోలేదు?
ముఖ్యంగా జాతి వివక్ష గురించిన ప్రధాన ప్రస్తావనతో తెరకెక్కిన ఈ చిత్రం ఆ అంశాన్ని సీరియస్ గా ప్రస్తావించలేదు. దానికి బదులు ఎక్కువుగా హ్యూమర్ అండ్ డ్రామా పై ఫోకస్ చేశారు. పాత్రల మధ్య సంఘర్షణ కూడా మనకు కనిపించదు. ఇక ఈశాన్య రాష్ట్రాల అమ్మాయిల పాత్రలు మాట్లాడుకొనే సంధర్భంలో సబ్ టైటిల్స్ మిస్సవడంతో వారి మధ్య సంభాషణలు అర్థం కావు.
చివిరి మాటగా
ఒక్క చిన్న వంటకం చేయడానికి ఎదురైన ఇబ్బంది చుట్టూ ఇతరుల సంప్రదాయాలు, ఆహారపు అలవాట్లు, సంప్రదాయాల పట్ల భారత ప్రజలలో ఉండే చులకన భావన, ఓర్చుకోలేని గుణం వంటి విషయాలను, వివక్షతను చెప్పిన విధానం ఈ మూవీ ప్రధాన బలంగా. ఓ సోషల్ ఇష్యూస్ ని హ్యూమరిక్ గా చెప్పిన దర్శకుడు చాలా వరకు సక్సెస్ అయ్యాడు. పాత్రల మధ్య సంఘర్షణ లేకపోవడం, జాతి వివక్షత అనే పాయింట్ పై అంతగా శ్రద్ద పెట్టకపోవడం నిరాశ పరిచే అంశాలు. మొత్తంగా ఎక్సోన్ మంచి అనుభూతిని పంచే వైవిధ్యమైన చిత్రం.
Rating: 3.5/5