సూర్య నటించిన తాజా చిత్రం ‘ఆకాశం నీ హద్దురా’. సుధా కొంగర దర్శకత్వంలో రూపొందిన ఈ సినిమా లాక్ డౌన్ నేపథ్యంలో థియేటర్లు తెరుచుకోకపోవడంతో ఓటీటీ ద్వారా విడుదలైంది. సినిమా ప్రేక్షకులకు విపరీతంగా నచ్చింది. విమర్శకులు ప్రశంసలు కురిపించారు. ఎయిర్ డెక్కన్ వ్యవస్థాపకుడు జి.ఆర్.గోపీనాథ్ జీవిత కథ ఆధారంగా ఈ చిత్రాన్ని తెరకెక్కించారు. సుధా కొంగర టేకింగ్, సూర్య నటన సినిమాను ఉన్నత స్థాయికి తీసుకెళ్ళాయి. సినిమా చూసిన వారందరినీ భావోద్వేగానికి గురిచేసింది.
ఈ సినిమాతో సూర్య ఖాతాలో మరొక మంచి చిత్రం చేరగా దర్శకురాలిగా సుధా కొంగర ప్రతిభ అందరికీ తెలిసింది. తమిళ సినీ ఇండస్ట్రీ గర్వించదగిన సినిమాగా ఈ చిత్రం నిలిచింది. తాజాగా సినిమాకు మరొక గొప్ప గౌరవం దక్కింది. సినిమా ఆస్కార్ రేసులో నిలిచింది. ఉత్తమ నటుడు, ఉత్తమ నటి, బెస్ట్ డైరెక్షన్, బెస్ట్ ఒరిజినల్ స్కోర్ లాంటి కేటగిరీల్లో ఆస్కార్ బరికి ఎంపికైంది. అంతేకాదు అకాడమీ స్క్రీనింగ్ రూమ్లో మంగళవారం ఈ చిత్రాన్ని ప్రదర్శించారని కూడ సమాచారం. మొత్తానికి సినిమాకు మంచి గుర్తింపే లభిస్తోంది.