విజయ్ దేవరకొండ, రష్మిక మందన్న జంటగా నటించిన పీరియాడిక్ యాక్షన్ డ్రామా ‘రణబలి’ రన్‌టైమ్ ఖరారైంది. చిత్ర నిర్మాణ వర్గాల సమాచారం ప్రకారం, ఈ సినిమా మొత్తం నిడివిని 170 నిమిషాలుగా లాక్ చేశారు. అంటే థియేటర్లలో ప్రేక్షకులు దాదాపు 2 గంటల 50 నిమిషాల పాటు ఈ కథా ప్రయాణాన్ని చూడనున్నారు.

1870ల నాటి మద్రాస్ కరువు, బ్రిటీష్ పాలనపై స్థానిక ప్రజల తిరుగుబాటు నేపథ్యంతో సాగే చారిత్రక కథ కావడంతో.. పాత్రల స్థాపన, ఎమోషన్స్, భారీ యాక్షన్ ఎపిసోడ్లకు తగినంత సమయం కేటాయించాల్సి వచ్చింది. ఇటీవల కాలంలో స్టార్ హీరోల చిత్రాలకు దాదాపు 3 గంటల వరకు నిడివి ఉండటం సాధారణంగా మారగా, ‘రణబలి’ కూడా అదే బాటలో నిలిచింది.

కథనంపై మేకర్స్ పూర్తి నమ్మకం

రన్‌టైమ్ కాస్త ఎక్కువే ఉన్నప్పటికీ, దర్శకుడు రాహుల్ సాంకృత్యన్ స్క్రీన్‌ప్లేను ఆద్యంతం గ్రిప్పింగ్‌గా నడిపించారని తెలుస్తోంది. ఇందులో విజయ్ దేవరకొండ టైటిల్ రోల్ పోషించగా, రష్మిక మందన్న ‘జయమ్మ’ పాత్రలో కనిపించనున్నారు. హాలీవుడ్ నటుడు ఆర్నాల్డ్ వోస్లూ ప్రతినాయకుడిగా కీలక పాత్ర చేశారు. కథలోని గాఢత, విజువల్స్ ప్రేక్షకులను కట్టిపడేస్తాయన్న నమ్మకంతోనే నిడివిని తగ్గించకుండా ఉంచినట్లు యూనిట్ వర్గాలు చెబుతున్నాయి.

మైత్రీ మూవీ మేకర్స్, టి-సిరీస్ సంయుక్తంగా నిర్మించిన ఈ చిత్రం అక్టోబర్ 16న తెలుగుతో పాటు హిందీ, తమిళ, కన్నడ, మలయాళ భాషల్లో పాన్-ఇండియా స్థాయిలో విడుదల కానుంది.