ముఖ్య అంశాలు
- కాలి గాయంతో ఐపీఎల్ 2026 సీజన్కు దూరమైన ఆస్ట్రేలియా ఆల్రౌండర్ జాక్ ఎడ్వర్డ్స్ స్థానంలో ఇంగ్లండ్ బౌలర్ డేవిడ్ పేన్ను సన్రైజర్స్ తీసుకుంది.
- రూ. 1.5 కోట్లకు ఎస్ఆర్హెచ్తో ఒప్పందం చేసుకున్న ఈ 35 ఏళ్ల పేసర్కు, ప్రపంచవ్యాప్తంగా టీ20ల్లో 304 వికెట్లు తీసిన సాలిడ్ రికార్డ్ ఉంది.
- ప్యాట్ కమిన్స్ తొలి మ్యాచ్లకు దూరమయ్యే సూచనలు ఉండటంతో, లెఫ్టార్మ్ పేసర్గా డేవిడ్ పేన్కు ప్లేయింగ్ 11లో ఆడే అవకాశం దక్కొచ్చు.
ఐపీఎల్ 2026 సీజన్ మొదలవ్వక ముందే సన్రైజర్స్ హైదరాబాద్ (SRH) ఫ్రాంచైజీ కీలక నిర్ణయం తీసుకుంది. ఆస్ట్రేలియా ఆల్రౌండర్ జాక్ ఎడ్వర్డ్స్ కాలి గాయంతో టోర్నీ మొత్తానికి దూరం కావడంతో, అతని స్థానంలో ఇంగ్లండ్ లెఫ్టార్మ్ పేసర్ డేవిడ్ పేన్ను జట్టులోకి తీసుకున్నారు. ఈ 35 ఏళ్ల సీనియర్ బౌలర్ను రూ. 1.5 కోట్ల బేస్ ప్రైస్తో సన్రైజర్స్ సొంతం చేసుకుంది. ఇన్నేళ్ల క్రికెట్ కెరీర్లో డేవిడ్ పేన్కు ఐపీఎల్లో అడుగుపెట్టడం ఇదే తొలిసారి.
టీ20ల్లో అద్భుతమైన రికార్డ్
ఇంగ్లండ్ తరఫున ఒకే ఒక్క వన్డే (2022లో నెదర్లాండ్స్పై) ఆడిన డేవిడ్ పేన్.. ప్రపంచవ్యాప్తంగా ఉన్న టీ20 లీగ్స్లో మాత్రం సత్తా చాటుతున్నాడు. ఇప్పటివరకు 233 టీ20 మ్యాచ్లు ఆడిన ఈ స్పీడ్స్టర్, ఏకంగా 304 వికెట్లు పడగొట్టాడు. అడిలైడ్ స్ట్రైకర్స్, పెర్త్ స్కార్చర్స్, డెసర్ట్ వైపర్స్, వెల్ష్ ఫైర్ లాంటి పాపులర్ జట్లకు ఆడిన అనుభవం అతనికి ఉంది. ముఖ్యంగా ఇటీవల ముగిసిన బిగ్ బాష్ లీగ్ (2025-26) సీజన్లో పెర్త్ స్కార్చర్స్ ఛాంపియన్గా నిలవడంలో పేన్ కీలక పాత్ర పోషించాడు. ఆ టోర్నీలో కేవలం ఆరు మ్యాచ్లే ఆడి 11 వికెట్లు తీయడంతో పాటు 6.47 ఎకానమీతో అదరగొట్టాడు. కచ్చితమైన లెంగ్త్లతో బౌలింగ్ చేసే ఈ ప్రదర్శనే సన్రైజర్స్ యాజమాన్యాన్ని ఆకర్షించింది.
ప్లేయింగ్ 11లో ఛాన్స్ దక్కుతుందా?
డేవిడ్ పేన్ జట్టులోకి వచ్చినా, అతనికి తుది జట్టులో (Playing 11) రెగ్యులర్గా అవకాశం వస్తుందా అనే చర్చ మొదలైంది. ఐపీఎల్ నిబంధనల ప్రకారం తుది జట్టులో నలుగురు విదేశీ ఆటగాళ్లు మాత్రమే ఆడాలి. ట్రావిస్ హెడ్, హెన్రిచ్ క్లాసెన్ స్థానాలకు డోకా లేదు. మిగిలిన రెండు స్థానాల్లో కెప్టెన్ ప్యాట్ కమిన్స్, లియామ్ లివింగ్స్టోన్, బ్రైడన్ కార్స్ లేదా కమిందు మెండిస్ లాంటి వాళ్లు పోటీపడతారు. కాబట్టి అందరూ ఫిట్గా ఉంటే పేన్కు బెంచ్ కే పరిమితం కావాల్సి వస్తుంది.
కానీ, సన్రైజర్స్ వ్యూహాల్లో ఒక చిన్న మార్పు పేన్కు కలిసొచ్చేలా ఉంది. వెన్నునొప్పి కారణంగా రెగ్యులర్ కెప్టెన్ ప్యాట్ కమిన్స్ తొలి ఐదారు మ్యాచ్లకు దూరంగా ఉంటూ తన వర్క్లోడ్ మేనేజ్ చేసుకోనున్నాడు. ఆ మ్యాచ్లలో ఇషాన్ కిషన్ కెప్టెన్గా బాధ్యతలు చేపడతాడు. కమిన్స్ ఆడని మ్యాచ్లలో విదేశీ పేసర్ కోటా కింద డేవిడ్ పేన్కు తుది జట్టులో అవకాశం దక్కే ఛాన్స్ స్పష్టంగా కనిపిస్తోంది. పవర్ ప్లేలో బంతిని స్వింగ్ చేయగల ఎడమచేతి వాటం బౌలర్ కావడం కూడా పేన్కు ప్లస్ పాయింట్. తొలిసారి ఇండియన్ పిచ్లపై, ఐపీఎల్ లాంటి ప్రెజర్ టోర్నీలో ఈ ఇంగ్లండ్ సీనియర్ బౌలర్ ఏ మేర రాణిస్తాడనేది ఇప్పుడు ఆసక్తిగా మారింది.